राहू – तालुकानिहाय आपल्या पक्षाची ताकद किती आहे. पक्षाची बलस्थाने काय आहेत, हे आपणास माहिती आहे. काही काळात आपण बारामती लोकसभा निवडणुकीला सामोरे जाणार आहोत. यासाठी कार्यकर्त्यांनी सज्ज राहावे. प्रत्येक बूथ सक्षम होण्यासाठी अधिक जोमाने कामाला लागावे, असे आवाहन भाजपचे बारामती लोकसभेचे प्रमुख व आमदार राहुल कुल यांनी केले.
बारामती लोकसभा निवडणुकीच्या प्रमुखपदी आमदार कुल, पुरंदर विधानसभा निवडणुकीच्या प्रमुखपदी बाबाराजे जाधवराव यांची निवड झाली आहे. त्यानिमित्त पुणे जिल्हा भारतीय जनता पक्षाच्या वतीने शेवाळेवाडी येथे दोघांचाही सत्कार जिल्हा उपाध्यक्ष राहुल शेवाळे यांच्या हस्ते करण्यात आला. त्यावेळी ते बोलत होते.
कुल म्हणाले की, वरिष्ठांशी चर्चा करून लवकरच बारामती लोकसभा मतदारसंघातील प्रमुख पदाधिकारी व कार्यकर्ते यांच्याशी सवांद साधला जाईल. पुढील नियोजन करण्यासाठी प्रत्येक मंडलात बैठकीचे आयोजन केले जाईल.
यावेळी गिरीश जगताप, सचिन लंबाते, निलेश जगताप, श्रीकांत ताम्हाणे, संजय निगडे, आनंद जगताप, राजेंद्र काळे, अमित झेंडे, माऊली चौरे, संतोष हरपळे, पदाधिकारी, कार्यकर्ते उपस्थित होते.