हृदयस्तंभासन हे शयनस्थितीतील आसन आहे. या आसनाचा संबंध सरळ हृदयाशी येतो त्यामुळे त्याला हृदयस्तंभासन म्हणतात. हे आसन करण्याची पद्धत खालीलप्रमाणे.
प्रथम मऊ चादरीवर शयनस्थिती घ्यावी.
दोन्ही हात लांब करून हात आणि डोके उचलावे.
दोन्ही पायांमध्ये अंतर घेऊन दोन्ही पायही उचलावे.
साधारण जमिनीपासून एक फुटापर्यंत डोके, हातपाय उचलण्याचा प्रयत्न करावा.
आसनस्थितीत संथ श्‍वसन करावे. आसनावस्थेमध्ये दृष्टी हृदयस्थानावर एकाग्र करावी आणि तिथले स्नायू ढिले सोडावे.
या आसनाची स्थिती सोडताना श्‍वास घेत घेत हळूहळू हात-पाय, डोके पूर्वस्थितीत न्यावेत.
हृदयस्तंभासनाचे फायदे
या आसनामुळे हृदय मजबूत होते, छाती, मान, पाठ, इत्यादी विकारांवर हे आसन लाभदायक आहे. हे आसन नियमित करणाऱ्यांना हृदयविकाराचा झटका येत नाही. मेद घटतो, अवाजवी चरबी वाढत नाही. आपले हृदय मजबूत रहावे असे प्रत्येकालाच वाटत असते. त्यांनी हे आसन रोज करावे. स्त्रियांनी हे आसन मासिकपाळीत तसेच गर्भावस्थेत करू नये. उच्च रक्‍तदाब, तसेच दमा असलेल्यांनी हे आसन डॉक्‍टरांना विचारल्याशिवाय करू नये. मधुमेहींनी हे आसन जरूर करावे कारण हातापायांना चांगला ताण येतो व शर्करा नियंत्रणास मदत होते.
==============
