पवनानगर – वनमंत्री सुधीर मुनगंटीवार यांनी दिलेल्या मंत्रामुळेच मी आमदार झालो, असे सूतोवाच राष्ट्रवादी कॉंग्रेसचे मावळमधील आमदार सुनील शेळके यांनी केले आहे. यामुळे मावळच्या राजकारणात पुन्हा एकदा नवी खेळी सुरू झाल्याच्या चर्चांना वेग आला आहे. पवनानगर येथे झालेल्या वृक्षारोपण कार्यक्रमात ते बोलत होते. याच कार्यक्रमात मुनगंटीवार यांनी शेळके पूर्वीश्रमीचे भाजपचेच आहेत, याची आठवण करुन देत चर्चांना आणखीनच हवा दिली आहे.
मावळचे आमदार सुनील शेळके हे पूर्वाश्रमीचे भाजपाचेच होते. मात्र तिकीट न मिळाल्याने ते राष्ट्रवादीत गेले. राजकारणात मनापासून काम केल्यास संधी मिळते, असे प्रतिपादन वनमंत्री सुधीर मुनगंटीवर यांनी पवनानगर येथील कार्यक्रमात केले. तत्पूर्वी बोलताना आमदार सुनील शेळके म्हणाले की, सुधीर मुनगंटीवार यांनी “कोशिश करने वालो की कभी हार नही होती’ असा मंत्र आपल्याला दिला. मला आमदार व्हायचेच होते. त्यांच्या या मंत्रामुळे मी आमदार झालो, असे आ. शेळके यांनी जाहीर सभेत सांगितले.
यावेळी पद्मभूषण रजनीकांत श्रॉफ, प्रा. भाऊसाहेब आगळमे, यशवंत मोहोळ, स्नेड्रा श्रॉफ, सुमीत चौक्सी, जुजर खुराकीवाला, प्रदिप सागर, शिल्पा सागर, पीएमआरडीएचे आयुक्त राहुल महिवाल, वनविभगाचे अधिकारी राहुल पाटील, सुनिल भोंगाडे, नायब तहसीलदार रावसाहेब चाटे, अलका धानिवले, कल्याणी ठाकर, उपसरपंच आशा कालेकर, सुवर्णा राऊत, सिमा ठाकर, अनंता वर्वे, बाळासाहेब मसूरकर, मुकुंद ठाकर आदी उपस्थित होते.
यावेळी बोलताना मुनगंटीवार म्हणाले की, शालेय विद्यार्थी हेच भावी पिढीचे भवितव्य आहे. शाळेतून संस्कारक्षम पिढी घडावी. देशाचे नेतृत्व करण्याचे बाळकडू शिक्षणात आहे. जीवनात धनापेक्षा वन महत्वाचे आहे. आरोग्यासाठी वन, वृक्ष आपल्याला अनेक पटीने देतात. उत्तम आरोग्यासाठी लावलेली झाडे जगवण्यासाठी सामूहिक प्रयत्नांची गरज आहे.
आमदार सुनील शेळके म्हणाले की, ग्रामीण भागात रस्ते, शिक्षण, आरोग्य यासाठी अधिक काम करणे गरजेचे आहे. विद्यार्थ्यांना चांगले शिक्षण मिळावे यासाठी ते अनेक अडचणींवर मात करून विद्यार्थी शिक्षण घेत असतात.
शालेय समितीचे अध्यक्ष संतोष खांडगे म्हणाले की, पवनानगर भागातील विद्यार्थ्यांना ग्रीन कल्चर महाविद्यालयासाठी जलसिंचन विभागाची जागा व निधी उपलब्ध करून देण्याची मागणी खांडगे यांनी मुनगंटीवार यांच्याकडे केली.
राजकीय चर्चांना उधाण
मावळमध्ये आजी-माजी आमदारांमध्येच कायमच कलगीतुरा सुरू असतो. माजी राज्यमंत्री असलेल्या संजय (बाळा) भेगडे यांना भाजपकडून ताकद दिली जात असतानाच राष्ट्रवादी कॉंग्रेसकडून आमदार झालेल्या सुनील शेळके यांनी आपल्या भाजपमधील जुन्या सहकाऱ्यांसोबत पुन्हा सलोखा वाढविण्यास सुरुवात केली असल्याचे आजच्या कार्यक्रमातून दिसून आले. तसेच या कार्यक्रमाला राज्याचे मंत्री आणि वरिष्ठ भाजप नेते सुधीर मुनगंटीवार उपस्थित असतानाही भेगडे यांची अनुपस्थितीत चर्चेचा विषय ठरत आहे.