पिंपरी – पिंपरी चिंचवड महानगरपालिकेच्या क्रीडा विभागामार्फत आंतरशालेय कला स्पर्धेचे आयोजन करण्यात आले होते. याअंतर्गतआयोजित केलेल्या चित्रकला स्पर्धेत 2340 विद्यार्थी सहभागी झाले होते. त्यातील पाचवी ते सातवी वयोगटास एशियन स्पर्धेतील एक दृश्य, आवडते निसर्ग दृश्य आणि स्वच्छता अभियान तर आठवी ते दहावी वयोगटासाठी मेरी माटी मेरा देश, चांद्रयान मोहिमेचे एक दृश्य आणि आपली वसुंधरा हे तीन विषय दिले होते. चित्रकला स्पर्धेच्या प्रारंभी वाद्य वादन, लेझीम, समूहगीत, शास्त्रीय गायन, एकांकिका, सुगम संगीत व लोकनृत्य अशा विविध कला सादर करण्यात आल्या.
आंतरशालेय स्पर्धेमध्ये 2 डिसेंबर रोजी पिंपरी चिंचवड संगीत अकादमी, निगडी येथे पहिली ते दहावी या विविध वयोगटातील विद्यार्थ्यांसाठी वाद्यवादन स्पर्धा, 4 डिसेंबर रोजी भारतरत्न डॉ. बाबासाहेब आंबेडकर मैदान, संत तुकाराम नगर येथे आंतरशालेय लेझीम स्पर्धा, 6 व 7 डिसेंबर रोजी आचार्य अत्रे रंगमंदीर, संत तुकाराम नगर येथे समुहगीत स्पर्धा, 11 व 12 डिसेंबर रोजी एकांकीका स्पर्धा तर 13 व 14 डिसेंबर रोजी पिंपळे गुरव येथील नटसम्राट निळु फूले नाट्यगृह येथे लोकनृत्य स्पर्धेचे आयोजन करण्यात आले आहे. या स्पर्धेसाठी विद्यार्थ्यांना वाहतुकीसाठी नियोजन करण्यात आले आहे. या सर्व स्पर्धांचा पारितोषिक वितरण समारंभ 14 डिसेंबर रोजी दुपारी 3.30 वाजता नटसम्राट निळू फुले नाट्यगृह, पिंपळेगुरव येथे संपन्न होणार आहे.
या स्पर्धेचे उद्घाटन अतिरिक्त आयुक्त विजयकुमार खोराटे यांच्या हस्ते झाले. यावेळी क्रीडा अधिकारी अनिता केदारी, जनता संपर्क अधिकारी प्रफुल्ल पुराणिक, प्रशासन अधिकारी परशुराम वाघमोडे, स्पर्धा प्रमुख दीपक कान्हेरे, अरूण कडूस, रंगराव कारंडे, गोरख तिकोणे, आत्माराम महाकाळ, अनिल जगताप, बनसी आटवे उपस्थित होते. प्रास्ताविक उपायुक्त मिनीनाथ दंडवते यांनी, सूत्रसंचालन क्रीडा पर्यवेक्षिका जयश्री साळवे यांनी तर आभार अनिता केदारी यांनी मानले.