गुरूपौर्णिमा उत्सवाच्या तीन दिवसांत सात कोटींचे दान
शिर्डी – लाखो भाविकांचे श्रद्धास्थान असलेल्या शिर्डीतील साईबाबा चरणी तीन दिवसांत तब्बल सात कोटींचे दान अर्पण करण्यात आले आहे. दक्षिणा पेटीत 2 कोटी 65 लाख, देणगी काउंटरवर एक कोटी 18 लाख, 25 लाख रुपये किमतीचे 472 ग्रॅम सोने आणि या व्यतिरिक्त साडेचार हजार किलो चांदीसुद्धा साईबाबांच्या चरणी अर्पण करण्यात आली आहे.
शिर्डीच्या साईबाबा मंदिरात गुरू पौर्णिमा उत्साहात साजरी झाली असून लाखो भाविकांनी दर्शन घेतल्याचे प्रशासनाकडून सांगण्यात येत आहे. साईबाबांच्या तीनदिवसीय गुरूपौर्णिमा उत्सवासाठी देश-विदेशातून सुमारे चार ते पाच लाख भाविकांनी दर्शन घेतले. त्याचबरोबर लाखो भाविकांनी दर्शनासह साईबाबांच्या चरणी दान केले आहे.
गुरूपौर्णिमा उत्सवात साईचरणी कोट्यवधींची गुरूदक्षिणा भाविकांकडून दान करण्यात येत आहे. उत्सवाच्या तीन दिवसांत सात कोटींचे दान जमा झाले असून तीन दिवसांत 2 लाख भाविकांनी साईदर्शन घेतले आहे. तर मागील वर्षीपेक्षा दानात तीन कोटींची वाढ झाली आहे.
राज्यभरातील मंदिरामध्ये भाविकांची रीघ आहे.
अशातच साईचरणीदेखील लाखो भक्त लीन होत असून दानपेटीतही भरघोस दान दिल जात आहे. त्याचबरोबर अनेक भाविक हे ऑनलाइन देणगी देत असतात. यात डेबिट, क्रेडिट कार्ड, ऑनलाइन देणगी, चेक, डीडी आणि मनीऑर्डर आदींद्वारे 2 कोटी 18 लाख रुपयांचे दान प्राप्त झाले आहे. या दानाव्यतिरिक्त उत्सव काळात सशुल्क तसेच ऑनलाइन पासेसद्वारे एकूण 67 लाख 33 हजार रुपयांचे उत्पन्न संस्थानला प्राप्त झाले आहे.
समाजोपयोगी कामासाठी दानाचा उपयोग
दरम्यान, भाविकांकडून मिळालेल्या देणगीतून संस्थान विविध भक्तोपयोगी आणि समाजोपयोगी कामे करते. साईसंस्थानचे साईनाथ रुग्णालयात नि:शुल्क तर साईबाबा रुग्णालयात माफक दरात वैद्यकीय उपचार करण्यात येतात. मोठ्या आजारांसाठी गोरगरीब रुग्णांना वैद्यकीय अनुदान देण्यात येते. प्रसादालयात मोफत अन्नदान करण्यात येते. वर्षाकाठी जवळपास दीड कोटी भाविक याचा लाभ घेतात. संस्थानच्या शैक्षणिक संकुलात सहा हजार विद्यार्थी नाममात्र दरात ज्ञानार्जन करत आहेत. भाविकांना माफक दरात निवास व्यवस्था उपलब्ध करून देण्यात आली आहे. राष्ट्रीय व नैसर्गिक आपत्तीतही संस्थान मदत करते.