पुणे – महापालिका प्रशासनाकडून 2020-21 या आर्थिक वर्षाचे आयुक्तांचे अंदाजपत्रक तयार करण्याचे काम सुरू केले आहे. दरवर्षी प्रमाणे यंदाही नागरिकांना या अंदाजपत्रकात आपल्या भागातील विकासकामे सूचविता येणार आहे. तसेच महापालिका प्रशासनाकडून आवाहनही करण्यात आले असून येत्या 9 सप्टेंबरपर्यंत ही कामे सूचविता येणार आहेत. त्यासाठी क्षेत्रिय कार्यालयांकडे अथवा पालिकेच्या संकेतस्थळावर अर्ज करायचा आहे.
महापालिकेच्या अंदाजपत्रकात 2006-07 पासून ही अभिनव संकल्पना राबविण्यात येते. त्यासाठी प्रत्येक प्रभागाला 1 कोटींचे अंदाजपत्रक असून प्रत्येकी 25 लाखांची जास्तीत जास्त 5 लाखांपर्यंतची कामे नागरिकांना सूचविता येतात. त्यामध्ये प्रामुख्याने रस्ता, पदपथ, पाण्याची लाईन, ड्रेनेज लाईन, पथ दिवे अशा स्वरुपाची कामे यामध्ये आहेत, असे लेखापाल उल्का कळसकर यांनी सांगितले आहे.