मुंबई – महाराष्ट्र राज्य सहकारी बँक प्रकरणात ही चौकशी झाली. या बँकेवर काही राजकीय नेते संचालक होते. त्यांच्याविरोधात २०१८ साली अण्णा हजारे आणि इतर काही समाजसेवक न्यायालयात गेले होते. यावेळी काही चुकीच्या गोष्टी राजकीय नेत्यांकडून झाल्या आहेत. या प्रकरणात माझे नाव देखील नाही. त्यानंतर आपण तपास संस्थांना सहकार्य करत असल्याचे राष्ट्रवादी काँग्रेसचे आमदार रोहित पवार यांनी म्हटले आहे.
दरम्यान पवार पुढे बोलताना म्हणाले की, माझी ईडी चौकशी सुरु असताना ईडी कार्यालयाबाहेर हजारो लोक आले. राज्यभरातून आलेल्या लोकांनी मला पाठिंबा दिला. जनता आमच्या बाजूने असल्याचे त्यातून समोर येत आहे. महाराष्ट्रात जे काही चालू आहे त्याच्या विरोधात आम्ही पूर्वी लढत होतो. तसेच आज पण आणि उद्या पण मी लढणार आहोत.
आमदार रोहित पवार यांची ईडी चौकशी बुधवारी झाली. तब्बल ११ तास ही चौकशी सुरु होती. आता पुन्हा १ फेब्रुवारी रोजी रोहित पवार यांना चौकशीसाठी बोलवण्यात आले आहे. दरम्यान, या चौकशीत काय विचारणा झाली ? त्यासंदर्भात रोहित पवार यांनी माहिती दिली आहे.
आम्हाला साहेबांचे पाठबळ
महाराष्ट्राचा विकास करण्याऐवजी गुजरात विकास काही लोक करत आहेत. हिच लोक सत्तेत हेत. त्यांना आम्ही आधी विरोध केला आताही करणार आणि उद्याही करणार, स्वाभिमानी महाराष्ट्रात जे चालले आहे, ते चुकीचे आहे. पवार साहेब मार्गदर्शक, राष्ट्रवादी काँग्रेसचे प्रमुख म्हणून आणि बाप माणूस म्हणून आले होते. आम्हाला काही अडचण आली तर सोडता यावी, यासाठी ते आले होते. यावेळी कार्यकर्त्यांशी ते संवाद साधत होते. चौकशी सुरु असताना शरद पवार थोडे चिंतेत होते. तरीसुद्धा पाठबळ ते देत होते, असेही रोहित पुढे म्हणाले.
आम्ही घाबरत नाही
ईडीला बँकेच्या या प्रकरणात काही कागदपत्रे हवी होती. ती सर्व कागदपत्रे आम्ही दिली आहेत. सर्व प्रकारची मदत आम्ही ईडीला करत आहोत. अधिकारी त्यांचे काम करतात, त्यांना लागणारी सगळी माहिती आम्ही दिलेली आहे. आम्ही कुठल्याही चुकीच्या गोष्टी केल्या नाही. त्यामुळे आम्ही घाबरत नाही, असे रोहित पवारांनी म्हटले आहे.
