न्हावरे – अन्न व नागरी पुरवठा विभागाच्या अंतर्गत असलेल्या पुणे जिल्हा ग्राहक संरक्षण परिषदेवर अशासकीय सदस्यपदी मांडवगण फराटा (ता. शिरूर) येथील संपत संभाजी फराटे यांची निवड करण्यात आली.
संपत फराटे हे अखिल भारतीय ग्राहक पंचायत शिरूर तालुकाध्यक्ष म्हणून गेल्या एक वर्षांपासून काम करीत आहेत. गेल्या १५ वर्षांपासून ते ग्राहक पंचायतीचे सक्रिय कार्यकर्ते आहेत. गाव तिथे ग्राहक पंचायत असा उपक्रम राबवून शेतकरी मेळावे, ग्राहक मेळावे प्रबोधन केले आहे. अनेक रुग्णांना त्यांनी आर्थिक मदत मिळवून दिली आहे.
फराटे यांनी केलेल्या सामाजिक कार्याची दखल घेऊन जिल्हाधिकारी डॉ. राजेश देशमुख यांनी त्यांची अशासकीय सदस्य म्हणून नियुक्ती केली. जिल्हा ग्राहक संरक्षण परिषदेचे कामकाज जिल्हाधिकाऱ्यांच्या अध्यक्षतेखाली असते. परिषदेत शहर पोलीस, जिल्हा परिषद, ग्रामीण पोलीस, अन्न व औषध प्रशासन, वैधमापन विभाग, आरोग्य विभाग, दूरसंचार विभाग, वीज वितरण कंपनी, व्यापार व उद्योग, पुणे व पिंपरी चिंचवड महानगरपालिका, शेतकरी प्रतिनिधी, वैद्यकीय प्रतिनिधी यासह शासकीय विभागांबरोबरच ग्राहक संघटना यांचे अशासकीय प्रतिनिधी सदस्य असतात.
ग्राहक व शासनाचा दुवा म्हणून काम करणार
संपत फराटे म्हणाले की, माझ्या सामाजिक कामाची दखल घेऊन नियुक्ती जिल्हाधिकारी डॉ. राजेश देशमुख यांनी नियुक्ती केली आहे. त्याबद्दल त्यांचे सर्वप्रथम आभार मानतो. तसेच या पदाच्या माध्यमातून जिल्ह्यातील ग्राहकांच्या समस्या, अडचणी सोडविण्यासाठी ग्राहक व शासनाचा दुवा म्हणून काम करणार आहे.