नवी दिल्ली : पाकिस्तानी गुप्तर यंत्रणेचा एजंट म्हणून काम करणाऱ्या व्यक्तीला नेपाळमध्ये ठार करण्यात आले असल्याचे सांगण्यात येत आहे. १९ सप्टेंबरला काठमांडूमध्ये आश्रय घेतलेल्या ठिकाणाबाहेर त्याची गोळ्या घालून हत्या करण्यात आली असल्याची माहिती समोर आली आहे.
गुप्तचर यंत्रणांनी एका इंग्रजी वृत्तपत्राला ही माहिती दिली. त्यानुसार, तो भारतात आयएसआयच्या बनावट नोटांचा सर्वात मोठा पुरवठादार होता. ही सर्व घटना सीसीटीव्हीत कैद झाली आहे. यामध्ये काही अज्ञात हल्लेखोर आयएसआय एजंटवर गोळीबार करत असल्याचं दिसत आहे. त्याची ओळख पटली अशून लाल मोहम्मद उर्फ मोहम्मद दर्जी असे नाव आहे.
आयएसआयच्या सांगण्यावरुन, लाल मोहम्मद पाकिस्तान, बांगलादेशमधून बनावट भारतीय चलन आधी नेपाळमध्ये आणायचा आणि नंतर भारतामध्ये पुरवठा करायचा. अधिकाऱ्यांनी दिलेल्या माहितीनुसार, लाल मोहम्मदचे संबंध अंडरवर्ड गँगस्टर दाऊद इब्राहिमच्या डी-गँगशीदेखील होते. त्याने आयएसआयच्या इतर एजंट्सनाही आश्रय दिला होता.
सीसीटीव्हीत लाल मोहम्मद काठमांडूमधील आपल्या घराबाहेर आलिशान गाडीतून खाली उतरताना दिसत आहे. यानंतर काही वेळातच दोन हल्लेखोर त्याच्यावर गोळीबार सुरु करतात. लाल मोहम्मद गाडीच्या मागे लपून जीव वाचवण्याचा प्रयत्न करतो, पण हल्लेखोर गोळीबार करत राहतात. सीसीटीव्हीत लाल मोहम्मदची मुलगी पहिल्या मजल्यावरुन उडी मारुन वडिलांच्या दिशेने धाव घेताना दिसत आहे. पण ती पोहोचेपर्यंत हल्लेखोर त्याला ठार करुन पळून जाण्यात यशस्वी झालेले दिसत आहे.