पुणे – राज्य सरकारच्या कंत्राटी भरतीमध्ये उमेदवारांकडून पैसे उकळण्यात येत असून, मोठ्या प्रमाणात भ्रष्टाचार होत आहे. या भ्रष्टाचाराचे पुरावे माझ्याकडे आहे. याबाबत चित्रफित माझ्याकडे येणार असून, त्याचा भांडाफोड मुंबईमध्ये करण्यात येणार आहे, असा गौप्यस्फोट विरोधी पक्षनेते विजय वडेट्टीवार यांनी आज पुण्यात केला.
वडेट्टीवार यांनी एका शैक्षणिक संस्थेच्या कार्यक्रमानिमित्त पुण्यात आल्यानंतर पत्रकारांशी संवाद साधला. राज्यातील शाळा आणि दवाखान्यांचे खासगीकरण करण्याचे धोरण सरकारने हाती घेतले आहे. याचा विरोध आम्ही करत आहोत. असे सांगून वडेट्टीवार म्हणाले, कंत्राटी भरतीच्या धोरणामुळे आरक्षण धोक्यात आले आहे. बेरोजगारांची फौज राज्यात उभी राहणार आहे. त्यामुळे या निर्णयाला आमचा कडाडून विरोध आहे. त्यामुळे हा निर्णय तातडीने रद्द करावा, अशी आमची मागणी आहे.
नांदेड मृत्यू प्रकरणी एसआयटी चौकशी हवी
नांदेडातील रुग्णांच्या मृत्यूप्रकरण राजकीय राजाश्रयाशिवाय हे शक्य नाही. त्यामुळे या सर्व प्रकाराची एसआयटीमार्फत चौकशी करण्यात यावी, अशी मागणी वडेट्टीवार यांनी केली.
पराभवाच्या भीतीने पोटनिवडणूक नाही…
पुणे आणि चंद्रपूर येथील लोकसभेच्या पोटनिवडणुकींमध्ये पराभव होत असल्याचे सर्वेक्षणातून पुढे आले आहे. त्यामुळे पोटनिवडणुका जाहीर होत नसल्याचे चित्र आहे. नोव्हेंबर-डिसेंबरमध्ये पाच राज्याच्या निवडणुका होत असून, यातील छत्तीसगढ, राजस्थान, मध्यप्रदेशात भाजपशी थेट लढत आहे. या ठिकाणी नक्कीच विजय प्राप्त होईल, असा विश्वास वडेट्टीवार यांनी व्यक्त केला.