न्यूयॉर्क : जगभरातील Whatsapp मध्ये आज दुपारी अचानक तांत्रिक बिघाड झाल्यामुळे लाखो युजर्सला मनस्ताप सहन करावा लागला आहे. व्हॉट्सअॅपवर युजर्सला आधी ग्रुप्सवर मेसेज पाठवता येत नव्हते. मात्र, काही काळाने पर्सनल चॅट्सवरही मेसेज पाठवणे अशक्य होऊन बसले. काही युजर्सला सर्व्हर डिसकनेक्शनचा मेसेज येऊ लागला, तर काहींचे मोबाईल अॅपच क्रॅश होऊ लागले.
साधारणपणे दुपारी १२ च्या सुमारास हा सगळा प्रकार सुरू झाल्यानंतर जवळपास दीड तासानंतर व्हॉट्सअॅपची कंपनी असलेल्या ‘मेटा’ कडून अधिकृत प्रतिक्रिया देण्यात आली आहे. युजर्स ट्विटरवर आपला राग व्यक्त करत असताना कंपनीने दिलेल्या प्रतिक्रियेमध्ये यासंदर्भात तातडीने कार्यवाही करत असल्याचे म्हटले आहे. “आम्हाला माहिती आहे की सध्या काही युजर्सला व्हॉट्सअॅप वापरण्यात अडचणी येत आहेत. आम्ही त्यावर काम करत असून लवकरात लवकर सगळ्यांसाठी सेवा पुन्हा सुरळीत करण्यासाठी आम्ही प्रयत्न करत आहोत”, असं ‘मेटा’च्या प्रवक्त्यांनी सांगितलं आहे.
आज दुपारी १२ वाजण्याच्या सुमारास व्हॉट्सअॅपवर काही युजर्सला मेसेज पाठवण्यास अडचणी येऊ लागल्या होत्या. हे मेसेजिंग बंद झाल्यानंतर काही काळाने पर्सनल चॅट्सवरही मेसेज जात नसल्यामुळे युजर्समध्ये अस्वस्थता निर्माण झाली. ट्विटरवर असंख्य युजर्सनी आपला राग व्यक्त केला असून लवकरात लवकर ही समस्या सोडवण्यात यावी, अशी मागणी युजर्सकडून करण्यात येत आहे.