बारामती – येथील बारामती तालुका सहकारी खरेदी विक्री संघाच्या अध्यक्षपदी विक्रम आनंदराव भोसले तर उपाध्यक्षपदी सोनाली दादासो जायपत्रे यांची आज बिनविरोध निवड करण्यात आली.
उपमुख्यमंत्री अजित पवार यांच्या सूचनेनुसार बारामती तालुका खरेदी विक्री संघाच्या अध्यक्षपदासाठी विक्रम भोसले (वाणेवाडी, ता. बारामती) तर उपाध्यक्षपदी सोनाली जायपत्रे (रा. मुढाळे) यांची नावे बारामती राष्ट्रवादी काँग्रेस पार्टीचे तालुकाध्यक्ष संभाजी होळकर यांनी जाहीर केली.
अध्यक्ष व उपाध्यक्षपदासाठी दोनच अर्ज आल्याने सहायक निबंधक मिलिंद टांकसाळे यांनी ही निवड बिनविरोध झाल्याचे जाहीर केले. बारामती तालुका सहकारी खरेदी विक्री संघाची स्थापना 1963 मध्ये झाली. संस्थेची उलाढाल आज 117 कोटी रुपये असून संस्थेच्या विविध दुकानांच्या 22 शाखा कार्यरत आहेत.
औषधे, बी बियाणे, खते, रासायनिक औषधांचा व्यापार संघाच्या वतीने केला जातो. संघामध्ये 126 कर्मचारी कार्यरत असून शेतकऱ्यांच्या दृष्टीने ही संस्था महत्त्वाची आहे. बारामती तालुक्यातील एक प्रमुख सहकारी संस्था म्हणून खरेदी विक्री संघाकडे पाहिले जात आहे.
—-