Lalbaugcha Raja – मुंबईतील लालबागच्या राजाच्या चरणी यावर्षी तब्बल पाच कोटी रुपयांचे दान जमा झाले आहे. नवसाला पावणारा बाप्पा अशी या गणपतीची ख्याती आहे. अनेक लोक लालबाग राजाकडे नवस बोलतात आणि तो पूर्ण झाल्यानंतर बोलल्याप्रमाणे आपला नवस पूर्ण करत असतात. त्यामाध्यमातून विविध वस्तूंच्या, पैशांच्या स्वरूपात दरवर्षी लालबाग गणपतीच्या चरणी करोडो रुपयांचे दान जमा होत असते. यावर्षीच्या गणेशोत्सवादरम्यान दहा दिवसात ‘लालबागचा राजा’च्या चरणी पाच कोटींचे दान जमा झाले आहे.
लालबाग राजा चरणी अर्पण केलेल्या वस्तूंचा नुकताच लिलाव करण्यात आला. यामध्ये एक किलोचा सोन्याचा हार, चांदीची गदा, सोन्या- चांदीचे मोदक, चांदीचा उंदीर, चांदीचे नारळ, चांदीचे ताट, विविध पूजेची सामग्री, चांदीचे छत, चांदीचा कळस, सोन्या चांदीची नाणी, सोनेरी गुलाबाचा हार, चांदीची पंक्ती, छोटे मोठे चांदीचे गणपती, सीजन क्रिकेट बॅट ,सोन्याचा मुलामा दिलेला चांदीचा मुकूट भक्तांनी अर्पण केले आहे. तसेच या वर्षी एका भक्ताने एक इलेक्ट्रीक बाईकही बाप्पा चरणी अर्पण केली. लालबागच्या राजाच्या चरणी अर्पण केलेल्या वस्तू घेण्यासाठी भाविकांनी गर्दी केली होती. दरवर्षीप्रमाणे याहीवर्षी गणेशोत्सवादरम्यान राज्य, देश परदेशातून भाविक बाप्पाच्या चरणी लीन होण्यासाठी आले होते.
दरम्यान, दरवर्षी लालबागचा राजाला किती देणगी जमा होते, याची माहिती मंडळातर्फे दिली जाते. लालबागच्या राजाच्या चरणी आलेल्या दानाची मोजदाद मंडळाकडून करण्यात आली. दहा दिवसांमध्ये लालबागच्या राजाच्या चरणी पाच कोटी सोळा लाख रुपये रोख रक्कमेचे दान आले आहे. तर साडेतीन किलो सोने आणि 64 किलो चांदी यावेळी लालबागच्या राजाच्या चरणी दान करण्यात आली आहे.
2022 मध्ये किती दान आले होते ?
गणेशोत्सवानंतर लालाबागचा राजा गणेशोत्सव मंडळाकडून दान केलेल्या या सोन्या-चांदीच्या वस्तूंचा लिलाव करण्यात आला होता. 2022मध्ये लालबागच्या राजाच्या वस्तूंचा लिलाव एकूण 1 कोटी 30 लाख रुपयांना झाला होता. गेल्यावर्षी लालबागच्या राजाच्या चरणी सोन्याची फुलं, सोन्याचे चरण, हार, अंगठी, मुकूट, कडे अशा वस्तू अर्पण करण्यात आल्या होत्या. चांदीचा गणपती, चांदीचा मोदक, चांदीच्या दुर्वा अशा चांदीच्या वस्तूही भक्तांनी राजाच्या चरणी अर्पण केल्या होत्या. त्याचसोबत एक हिरो होंडाची बाईक देखील दान करण्यात आली होती. लालबागच्या राजाच्या दानपेटीत दहा दिवसांत तब्बल पाच कोटी रुपये दान जमा झाले होते.