कोल्हापूर – कोल्हापूर जिल्ह्यातील गोकुळ शिरगाव येथे एका कंपनीला आज दुपारच्या सुमारास भीषण आग लागली. ही कंपनी केमिकलची असल्याने आगीचे स्वरूप मोठ्या प्रमाणात होते. सध्या आग आटोक्यात आली असून अग्निशमन दलाच्या अनेक बंबांद्वारे ही आग नियंत्रणात आणण्यात अग्निशमन दलाला यश आले.
यावेळी कंपनीतील कामगारांना आणि नागरिकांना परिसरातून सुरक्षितस्थळी हलविण्यात आले. यामुळे कोणतीही जीवितहानी झालेली नाही. मात्र आगीचे लोळ इतक्या मोठ्या प्रमाणात होते की पुणे-बेंगळुरू राष्ट्रीय महामार्गावरूनही स्पष्टपणे दिसत होते. बाजूलाच कोल्हापूर विमानतळ असल्याने विमान सेवेवरही परिणाम होण्याची शक्यता व्यक्त केली जात होती.
गोकुळ शिरगाव येथील एका केमिकल कंपनीला दुपारी आग लागली. आगीचे आणि धुराचे लोळ दूरदूरपर्यंत उठले होते. आगीमुळे कंपनीत असलेल्या सिलिंडरचेही मोठ-मोठे स्फोट झाले. ही आग तीन तासांहून अधिक वेळ धगधगत होती. यात जीवितहानी झाल्याचे अद्याप कुठलेही वृत्त नाही. पण आगीत कंपनीचे मात्र मोठ्या प्रमाणात नुकसान झाल्याची माहिती आहे.
आग लागलेल्या कंपनीचे नाव सेराफ्लेक्स इंडिया प्रायव्हेट लिमिटेड असे आहे. ही कंपनी कोल्हापुरातील गोकुळ शिरगाव एमआयडीसी परिसरात आहे. येथे केमिकल पेट्रोलियमचे काम केले जाते. आगीचे कारण अद्याप अस्पष्ट आहे. पण शॉर्ट सर्किटमुळे आग लागल्याचं कंपनी मधील कर्मचाऱ्यांकडून सांगण्यात आले आहे.
तर आजूबाजूला देखील केमिकल आणि पेट्रोलियमच्या कंपन्या असल्याने आजूबाजूच्या कंपन्यांनाही आगीमुळे मोठा धोका निर्माण झाला होता. यामुळे परिसरातील विद्युत पुरवठा खंडित करण्यात आला. तर अग्निशमन दलाचे गाड्या सोबतच विमानतळ प्राधिकरणाचे अग्निशमन दलाची गाडी तसेच स्थानिक टॅंकरच्या मदतीने ही आग आता आटोक्यात आली आहे.