कोलकाता – लखनौ सुपर जायंट्सचा कर्णधार लोकेश राहुल व दीपक हुडा यांच्या घणाघाती फलंदाजीनंतरही गोलंदाजांनी केलेल्या भेदक माऱ्याच्या जोरावर रॉयल चॅलेंजर बेंगळुरूने यंदाच्या आयपीएल स्पर्धेच्या एलिमिनेटर सामन्यात 14 धावांनी विजय प्राप्त केला. या विजयाच्या जोरावर बेंगळुरूने दुसऱ्या क्वालिफायर सामन्यात प्रवेश केला असून त्यांचा राजस्थान रॉयल्सशी सामना होणार आहे.
.@RCBTweets seal a spot in the #TATAIPL 2022 Qualifier 2! 👏 👏@faf1307 & Co. beat #LSG by 14 runs in the high-scoring Eliminator at the Eden Gardens, Kolkata. 👍 👍
Scorecard ▶️ https://t.co/cOuFDWIUmk #TATAIPL | #LSGvRCB pic.twitter.com/mOqY5xggUT
— IndianPremierLeague (@IPL) May 25, 2022
बेंगळुरूने विजयासाठी दिलेल्या 208 धावांचा पाठलाग करताना लखनौचा सलामीवीर क्वांटन डिकॉक पहिल्याच षटकांत बाद झाला. त्यानंतर मनन व्होरालाही यश आले नाही. त्यानंतर मात्र, कर्णधार लोकेश राहुलने दीपक हुडाच्या साथीत संघाचा डाव केवळ सावरला. या जोडीने तिसऱ्या गड्यासाठी 96 धावांची भागीदारी केली. दरम्यान, राहुलने आपले अर्धशतक पूर्ण केले.
हुडाला अर्धशतक पूर्ण करता आले नाही. तो 26 चेंडूत 1 चौकार व 4 षटकार फटकावून 45 धावांवर परतला. यावेळी राहुलच्या साथीला मार्कस स्टोनिस खेळपट्टीवर आला.राहुलने स्टोनिसच्या साथीत संघाचे दीडशतक फलकावर लावले. स्टोनिस बाद झाला. एका बाजूने राहुल भक्कमपणे खेळपट्टीवर उभा होता. त्याने चौफेर टोलेबाजी केली. मात्र, अनावश्यक फटका मारताना तो 79 धावांवर बाद झाला आणि सामना बेंगळुरूच्या बाजूने झुकला. राहुलने आपल्या खेळीत 58 चेंडूंचा सामना करताना 3 चौकार व 5 षटकार फटकावले.
राहुलपाठोपाठ कृणाल पंड्याही बाद झाला. इवान लेविस व दुष्मंत चमिरा यांनाही फार संधी मिळाली नाही. हेझलवूडने 3 गडी बाद केले.
रजत पाटीदारचे वादळी शतक व दिनेश कार्तिक आणि विराट कोहली यांनी केलेल्या उपयुक्त खेळीच्या जोरावर रॉयल चॅलेंजर बेंगळुरूने पहिल्यांदा फलंदाजी करताना 20 षटकांत 4 गडी गमावून 207 धावांचा डोंगर उभा केला. मोहसीन खानच्या पहिल्याच षटकात बेंगळुरूचा कर्णधार पाफ डुप्लेसी बाद झाला.
कोहलीने त्यानंतर रजत पाटीदारला सुरेख साथ दिली व संघाला अर्धशतकी मजल मारून दिली. कोहली स्थिरावलेला असताना आवेश खानच्या गोलंदाजीवर अनावश्यक फटका मारून 24 चेंडूत 2 चौकारांसह 25 धावा करून बाद झाला. कृणाल पंड्याने भरात असलेल्या ग्लेन मॅक्सवेलला बाद केले, तर रवी बिष्णोईने महिपाल लोमरोरचा अडथळा दूर केला. त्यावेळी पाटीदारने अर्धशतक पूर्ण केले. त्यानंतर दिनेश कार्तिक खेळपट्टीवर आला. या जोडीने पाचव्या गड्यासाठी 92 धावांची अखंडित भागीदारी केली. पाटीदारने वादळी खेळी करत आपले शतकही पूर्ण केले. त्याने नाबाद 112 धावांच्या खेळीत अवघ्या 54 चेंडूंचा सामना करताना 12 चौकार व 7 षटकारांची आतषबाजी केली. कार्तिकनेही नाबाद 37 धावांच्या खेळीत 23 चेंडूत 5 चौकार व 1 षटकार फटकावला.
संक्षिप्त धावफलक
रॉयल चॅलेंजर बेंगळुरू – 20 षटकांत 4 बाद 207 धावा. (विराट कोहली 25, रजत पाटीदार नाबाद 112, दिनेश कार्तिक नाबाद 37, मोहसीन खान 1-25, कृणाल पंड्या 1-39, आवेश खान 1-44, रवी बिष्णोई 1-45). लखनौ सुपर जायंट्स – 20 षटकांत 6 बाद 193 धावा. (दीपक हुडा 45, लोकेश राहुल 79, जोश हेझलवूड 3-43).