मुंबई – गेल्या वर्षी करोना ज्या वेगाने पसरत होता, त्याच्या किती तरी जास्त पटींनी करोनाचा संसर्ग 2021 मध्ये पसरू लागला आहे. ज्या वेगाने तो हातपाय पसरतोय, ते अतिशय घातक आहे. भारतात 18 राज्यांमध्ये करोनाचा नवा स्ट्रेन सापडला असून त्याची लक्षणेही सतत बदलत असल्याचे आढळून आले आहे.
जुन्या करोनाची ताप, चव, वास जाणे, श्वास घ्यायला त्रास, घशात खवखव अशी लक्षणे होती. तर ताप, कोरडा खोकला, अशक्तपणा, डोकेदुखी, जुलाब, अंगदुखी, त्वचेवर रॅशेस ही नव्या कोरोनाची लक्षणे आहेत.
फेब्रुवारी महिन्यात एक व्यक्ती शून्य लोकांना संक्रमित करत होती. त्यात आता प्रचंड वाढ झाली आहे. काही दिवसांमध्ये देशात रोज एक लाख रुग्ण वाढण्याची शक्यताही वर्तवण्यात आली आहे. महाराष्ट्रात 15 एप्रिलपर्यंत रुग्णांची संख्या वाढण्याचा अंदाज आहे.
कोरोनाच्या पहिल्या लाटेत भारतात दिवसाला सर्वाधिक रुग्णसंख्या 97 हजार 500 एवढी होती. दुसरी लाट यापेक्षा भयानक आहे. एप्रिल मध्यानंतर ही लाट कमी होईल असा अंदाज आहे. त्यामुळे मास्क घाला आणि सुरक्षित अंतर ठेवा असे आरोग्य मंत्रालयाकडून सांगण्यात येते आहे.