राष्ट्रवादीचे शहराध्यक्ष संजोग वाघेरे यांच्या मध्यस्थीला यश
पिंपरी – पिंपरी-चिंचवड महापालिकेतील अनेक ठेकेदारांची सत्ताधाऱ्यांनी अडवून ठेवलेली गेल्या आर्थिक वर्षांतील बिले देण्यासंदर्भात उपमुख्यमंत्री अजित पवार यांनी आदेश दिल्यानंतर स्थायीने आज या बिलांना मान्यता दिली आहे. ही बिले मिळावीत यासाठी राष्ट्रवादीचे शहराध्यक्ष संजोग वाघेरे यांनी मध्यस्थी केली होती त्याला यश आल्याचे मानले जात आहे.
महापालिकेमध्ये विविध ठेकेदारांनी गत आर्थिक वर्षात शहरात 690 विकासकामे केली होती. त्यापोटी 208 कोटी 40 लाख रुपये एप्रिल महिन्यातच महापालिकेने अदा करणे अपेक्षित होते. मात्र करोनामुळे ही बिले रोखण्यात आली होती. यानंतर राज्य शासनाने 3 जून 2020 गतवर्षातील ठेकेदारांची बिले अदा करावीत, असा आदेश काढला होता.
त्यानंतरही गेल्या महिनाभरापासून जाणीवपूर्वक ही बिले अदा करण्यात आली नव्हती. त्यामुळे ठेकेदारांची अडचण निर्माण झाली होती. त्यातच सत्ताधाऱ्यांकडून या बिलांसाठी आर्थिक रसदीसाठी ठेकेदारांकडे तगादा लावण्यात आला होता. हा प्रकार समोर आल्यानंतर पिंपरी-चिंचवड कॉन्ट्रॅक्टर्स असोसिएशनचे अध्यक्ष बिपीन नाणेकर यांच्यासह काही ठेकेदारांनी आपली अडचण राष्ट्रवादीचे शहराध्यक्ष वाघेरे यांच्याकडे मांडली होती. या प्रकरणी मध्यस्थी करत वाघेरे यांनी उपमुख्यमंत्री पवार आणि ठेकेदारांच्या शिष्टमंडळाची भेट घडवून आणली होती. यानंतर पवार यांनी ठेकेदारांची बिले अदा करण्यासंदर्भात आयुक्त श्रावण हर्डीकर यांना आदेश दिले होते. हे आदेश मिळताच आज (दि. 10) झालेल्या स्थायीच्या सभेत आयत्यावेळी हा विषय घेऊन मंजूर करण्यात आला.
पवार यांच्या मध्यस्थीमुळे हा प्रश्न सुटल्याचा दावा वाघेरे यांनी केला असून गेल्या महिनाभरापासून आर्थिक हितसंबंधासाठी सत्ताधाऱ्यांनी ठेकेदारांना जाणीवपूर्वक त्रास दिला होता. सत्ताधाऱ्यांनी करोनाकाळात कोणालाही वेठीस धरू नये, असे आवाहनही त्यांनी केले आहे.