पिंपरी, (प्रतिनिधी) – अवकाळीने मंगळवारी (दि.16) शहरात हजेरी लावत चांगलीच दाणादाण उडवून दिली. त्यामुळे शहरात ठिकठिकाणी झाड पडण्याच्या 24 घटनांची नोंद झाली आहे. जुन्या पुणे-मुंबई महामार्गाबरोबरच पुणे-नाशिक महामार्गावरदेखील झाडे पडल्याने दोन्ही महामार्गावर वाहतुकीची कोंडी झाल्याचे चित्र पहायला मिळाले.
शहरात सोमवारी (दि.15) सायंकाळी ढगाळ वातावरण होते. मात्र, यादिवशी अवकाळीने हुलकावणी दिली. दुसर्‍यादिवशी मात्र भोसरी, नाशिकफाटा, कासारवाडी, सांगवी या भागात अवकाळीने जोरदार हजेरी लावली. त्यामुळे या भागातील वीजपुरवठा खंडीत झाला होता. वीजपुरवठा सुरळीत होण्यासाठी नागरिकांना अनेक तास वाट पहावी लागल.
त्यामुळे नाशिक फाटा येथील अनेक झाडे वाहनांवर पडली. या घटनांमध्ये सुदैवाने कोणतीही जिवीतहानी झाली नाही; मात्र झाडाखाली सापडलेल्या वाहनांचे मोठे नुकसान झाले. या घटनांमुळे दोन्ही महामार्गावर वाहतूक कोंडी झाली होती. पावसापासून बचाव करण्यासाठी कामगारांना सुरक्षित ठिकाणी आसरा घ्यावा लागला.
अवकाळीच्या जोरदार हजेरीने शहराच्या सखल भागात पाणी साचल्याने दुचाकीस्वारांना यातून मार्ग काढताना मोठी कसरत करावी लागली. तर अवकाळीने भोसरी औद्योगिक परिसरातील वीजपुरवठा खंडित झाला होता.त्यामुळे या भागातील उद्योजकांचे मोठे आर्थिक नुकसान झाले. या परिसरामध्ये अनेक झाडे धोकादायक स्थितीमध्ये असून या झाडांचा तारेला स्पर्श झाल्याने पुरवठा खंडित होत असल्याचा आजवरचा अनुभव आहे.
भोसरी औद्योगिक वसाहतीमधील टी ब्लॉक, जे ब्लॉकसह अन्य भागातील अनेक उद्योगांना वीजपुरवठ्याचा फटका बसला आहे, अशी माहिती ेइंडस्ट्रीज असोसिएशन अध्यक्ष अभय भोर यांनी दिली.
