पुणे – शहरासह जिल्ह्यात मागील दोन ते तीन दिवसांपासून ढगाळ वातावरण, दुपारनंतर मेघगर्जना आणि वादळी वाऱ्यासह होत असलेल्या पावसामुळे उष्णतेचा पारा हळूहळू खाली येऊ लागला आहे. सलग दुसऱ्या दिवशी रविवारी (दि. 21) शहरातील पारा 40 अंशाच्या खाली गेला असून, जिल्ह्यात सर्वाधिक शिरूर तालुक्यात 40.6 अंश सेल्सिअस कमाल तापमानाची नोंद झाली.
आठवड्याच्या सुरुवातीलाच पुण्यातील उष्णतेच्या पाऱ्याने उच्चांक गाठला होता. तब्बल 43.5 अंशांपर्यंत कमाल तापमान गेल्याने अंगाची लाहालाही झाली होती. अशा परिस्थितीत दुपारी घराबाहेर पडायचे म्हटले तरी मनात धस्स होत होते. मात्र, हवामानातील बदलामुळे दोन ते तीन दिवसांपासून शहरासह जिल्ह्यातील सर्वच भागांत मेघगर्जनेसह जोरदार पाऊस पडत आहे. त्यामुळे हवेतील गारवा वाढला असून, परिणामी कमाल तापमानात दोन ते तीन अंशांनी घट झाली आहे.
43 अंशांवर पोहचेलेले कमाल तापमान दोन दिवसानंतर 40 अंशांपर्यंत खाली आले आहे, तर शहराच्या बहुतांश भागातील कमाल तापमान 39 अंशांच्या खाली गेल्यामुळे उन्हाचा चटका कमी झाला आहे. मात्र, उकाडा वाढला असून, रात्री हवेत गारवा असल्यामुळे काहीसा दिलासा मिळत आहे. दरम्यान, पुढील दोन दिवस शहरात आकाश निरभ्र राहील. दुपारनंतर आकाश ढगाळ, तर काही भागात मेघगर्जनेसह पावसाच्या हलक्या सरी पडतील, असा अंदाज पुणे वेधशाळेने वर्तविला आहे.
शहरासह जिल्ह्यातील काही प्रमुख भागांतील कमाल तापमान
शिरूर – 40.6, वडगावशेरी – 40.1, हडपसर – 39.6, कोरेगांव पार्क – 39.5, चिंचवड – 39.2, मगरपट्टा – 38.7, इंदापूर – 38.5, एनडीए – 37.9, शिवाजीनगर – 37.8, बारामती – 37.7, पाषाण – 37.4, हवेली – 37.