नवी दिल्ली – कोरोना व्हायरसने जगभरात थैमान घातले असून आता भारतातही कोरोना व्हायरस पसरायला सुरुवात झाली आहे. या व्हायरसमुळे भारतात अनेकांना आपले प्राण गमवावे लागले आहेत.
दरम्यान, भारतात लॉकडाऊन असल्यामुळे देशाची अर्थव्यवस्था देखील ढासळली आहे. सगळे उद्योगधंदे बंद असल्याने सरकारला मिळत असलेले टॅक्स देखील बंद झालेले आहे. त्यामुळे अर्थव्यवस्था सुधारण्यासाठी सरकारने मद्यविक्रीला परवानगी दिली आहे. दारुची दुकानं सुरू झाल्यानंतर तळीरामांनी वाईन शॉपजवळ मोठ्या प्रमाणात गर्दी केली. एवढेच नव्हे तर कित्येक किलोमीटरच्या रांगा देखील लावल्या.
दरम्यान, उत्तर प्रदेशात तर काल (दि. ४) एकाच दिवशी सुमारे २६ हजार मद्याच्या दुकांनामधून लोकांनी तब्बल १०० कोटींचे दारू विकत घेतली. उत्तर प्रदेशात दर दिवशी ७० ते ८० कोटी रुपयांची मद्यविक्री होत असते. उत्तर प्रदेशची राजधानी लखनऊमध्ये ४ तासांमध्ये ६.३ कोटी रुपयांची विक्री झाल्याचे सांगण्यात आले आहे.