जीवितहानी नाही : कार जळून खाक
बारामती/ जळोची – बारामती शहरातील मार्केट यार्ड रस्त्यावर थांबलेल्या कारने अचानक पेट घेतल्याने खळबळ उडाली. बुधवारी (दि.9) सायंकाळी हा प्रकार घडला. सुदैवाने या आगीत कोणतीही जीवितहानी झाली नाही. कारचे मोठ्या प्रमाणात नुकसान झाले. बारामतीकरांनी यावेळी “बर्निंग कार’चा थरार अनुभवला.
सायंकाळी सहाच्या सुमारास मार्केट यार्डच्या मागील प्रवेशद्वारापासुन काही अंतरावर ही चारचाकी गाडी थांबली होती. यावेळी कारने अचानक पेट घेतला. यावेळी कारमध्ये कोणी नसल्याने कोणतीही जीवीतहानी झालेली नाही. मात्र, आग लागलेली पाहण्यासाठी नागरीकांनी मोठी गर्दी केली होती. सुदैवाने नगरपरिषदेचे अग्नीशामक दलाचे वाहन वेळीच पोहचले. या वाहनाने आग वेळीच आटोक्‍यात आणली. मात्र, कारचे आगीत मोठे नुकसान झाले आहे.
या कारचे चालक वालचंदनगर (ता. इंदापूर) येथील असून त्यांचे नाव दत्तात्रय जाधव असल्याची माहिती पोलीस सुत्रांनी दिली.पोलीसांकडे देखील सायंकाळी उशीरा जाधव या प्रकरणी माहिती देण्यासाठी पोहोचले होते.
जाधव हे त्यांच्या कारमधून बारामती येथील खासगी बालरुग्णालयात दाखल असलेल्या त्यांच्या नातेवाईकांच्या लहान मुलाला वालचंदनगर येथे नेण्यासाठी आले होते. दवाखान्याजवळ येतानाच हा अपघात घडला. हाच अपघात रुग्णालयातून लहान मुल आणि अन्य नातेवाईक घेऊन जाताना घडला असता,तर मोठा अनर्थ घडण्याची भीती होती. मात्र, सुदैवाने वेळेआधीच आग लागल्याने पुढील अनर्थ टळल्याचे दत्तात्रय जाधव यांनी सांगितले. बारामतीत भिगवण चौकातून या भागात येतानाच गाडीचे ब्रेक निकामी झाल्याचे जाणवले. त्यामुळे त्याच परिस्थितीत गाडी बाजुला घेताना अचानक कारने पेट घेतला. प्रसंगावधान राखून मी बाहेर पडलो.
स्थानिकांनी मदत केली. अग्नीशामक दलाला कळवले. सुदैवाने वेळेआधीच अपघात घडल्याने पुढील अनर्थ टळला. नशीब बलवत्तर म्हणून बचावल्याची प्रतिक्रिया जाधव यांनी व्यक्‍त केली.
