जम्मू – कुपवाडा जिल्ह्यातील हंदवाडा येथे सुरक्षा दलाला मोठे यश आले आहे. सुरक्षा यंत्रणांनी हंदवाडा परिसरात एका अल्पवयीन मुलासह तीन दहशतवाद्यांना अटक केली आहे. त्यांच्याकडून शस्त्रास्त्रे आणि दारूगोळा जप्त करण्यात आला आहे. या तिघांनाही परिसरात दहशतवादी हल्ले घडवून आणण्याचे काम देण्यात आले होते.
मंजूर अहमद कुमार, शौकत अशी अटक करण्यात आलेल्यांची नावे आहेत. जम्मू आणि काश्‍मीर पोलिसांनी दिलेल्या माहितीनुसार, हंदवाडा येथील फ्रूट मंडी क्रॉसिंगवर संयुक्त ब्लॉक तपासणी मोहिमेदरम्यान सुरक्षा दलांना तीन तरुणांना संशयास्पद स्थितीत आढळले. पोलिसांनी चालान कापल्यानंतर तिघांनी घटनास्थळावरून पळून जाण्याचा प्रयत्न केला. परंतु, सुरक्षा दलाच्या जवानांनी तिघांनाही पकडले.
सुरक्षा दलांनी त्यांच्याकडून एक पिस्तूल, एक पिस्तूल मॅगझिन, 7 गोळ्या आणि दोन हातबॉम्ब जप्त केले. या संदर्भात हंदवाडा पोलीस ठाण्यात एफआयआर दाखल झाला असून पुढील तपास सुरू असल्याची माहिती लष्कराकडून देण्यात आली आहे.
