मुंबई – हॉलीवूडचा प्रसिद्ध शो ‘मॅन व्हर्सेस वाइल्ड’ जगभरात खूप प्रसिद्ध आहे. या शोची प्रसिद्धी भारताबरोबरच परदेशातही मोठी आहे. जेव्हापासून बेअर ग्रिल्स या शोच्या होस्टने भारतीय सेलिब्रिटींसोबत शो करायला सुरुवात केली तेव्हापासून त्याच्या चाहत्यांची संख्या आणखी वाढली आहे. पंतप्रधान नरेंद्र मोदी आणि अक्षय कुमार यांच्यासह इतर बड्या व्यक्तींसोबत बेअर ग्रिल्सने जंगलात कूच केली होती.हे एपिसोड चांगलेच जगप्रसिद्ध झाले होते. आता बेअर ग्रिल्स लवकरच प्रियांका आणि विराटसोबत एक एपिसोड करणार आहे याबाबतची चर्चा सुरु असल्याचे देखील बेअरने स्पष्ट केले.
बेअर ग्रिल्सने प्रियांका चोप्रा आणि विराट कोहलीसोबत ‘मॅन व्हर्सेस वाइल्ड’चा एपिसोड शूट करण्याची इच्छा व्यक्त केली आहे. एका इंग्रजी वृत्तपत्राशी संवाद साधताना, त्याने प्रियांका चोप्रा आणि विराट कोहली यांच्याशी बोलणे सुरू असल्याचे उघड केले. “या साहसी प्रोग्रॅममध्ये प्रियांका चोप्रा आणि विराट कोहलीला होस्ट करण्यासाठी उत्सुक असल्याचे बेअर ग्रिल्सने यावेळी म्हंटले.
ग्रिल्स म्हणाला, ‘मी सगळ्या गोष्टी आताच उघड करणार नाही. खूप काही सुरु आहे.’विराट कोहलीसोबत प्रियांका आमच्या पुढील शोसाठी नंबर वन सेलिब्रिटी आहे. हे दोघेही असे प्रेरणादायी व्यक्तिमत्त्व आहेत ज्यांना जगभरात लोकप्रियता आहे. त्यामुळे त्यांचा प्रवास आणि त्यांचे जीवन जाणून घेणे हा माझ्यासाठी आणि प्रत्येकासाठी एक चांगला अनुभव असेल.
गेल्या काही वर्षांत, बेअर ग्रिल्सने अनेक वेळा भारतात प्रवास केला आहे. कोलकाता, दार्जिलिंग अशा काही शहरांना त्याने भेट दिली. तो शेवटचा ‘वॉर झोन: बेअर ग्रिल्स मीट्स प्रेसिडेंट झेलेन्स्की’ मध्ये दिसला होता. या शोमध्ये त्याने कबूल केले होते की ‘भारत त्याच्यासाठी खूप प्रिय आहे’. बेअर ग्रिल्स याआधी विकी कौशलसोबत ‘इनटू द वाइल्ड विथ बेअर ग्रिल्स’ या रिअॅलिटी शोमध्ये दिसला होता. याशिवाय त्याने अक्षय कुमार, रणवीर सिंग आणि पंतप्रधान नरेंद्र मोदी यांच्यासह इतरांसोबतही शूटिंग केले आहे.
