याच वर्षी 26 फेब्रुवारी रोजी प्रसिद्ध झालेला माझा लेख हा खासकरून प्री-आयपीओ या विषयाला धरून कॅथलिक सिरियन बॅंकेबाबत होता. त्यामागं उद्देश हाच होता की, जसं शेअर बाजारात एखाद्या कंपनीची नोंदणी झाल्यावर त्याचे शेअर्स घेता येतात (ज्याला सेकंडरी मार्केट म्हणतात). तेच शेअर्स कंपनीच्या प्राथमिक समभाग विक्रीद्वारे घेतले असल्यास त्यास (आयपीओ किंवा प्राथमिक समभाग विक्री) प्रायमरी मार्केट म्हणतात.
ज्याप्रमाणं प्रायमरी स्कूलच्या आधी प्री-प्रायमरी शाळा असते त्याचप्रमाणं आयपीओच्या आधी देखील प्री-प्रायमरी मार्केट असतं जे संपूर्णरीत्या कायदेशीर असतं, ही बाब अनेकांना ठाऊक नसते. कंपनीचे अंडररायटर्स, कंपनीचे उच्चपदस्थ कर्मचारी किंवा कंपनीमध्ये गुंतवणूक केलेले खासगी गुंतवणूकदार (प्रायव्हेट इक्विटी) आपल्याकडील शेअर्स कांही खास आर्थिक सल्लागारांमार्फत विक्रीस काढतात. असे शेअर्स घेणारे बडे गुंतवणूकदारही या कानाचं त्या कानाला होऊ न देता अशा संधी शोधतच असतात. सर्वसामान्य किरकोळ गुंतवणूकदारांनादेखील याचा लाभ घेता यावा या उद्देशानं वर उल्लेख केलेला लेख लिहिला होता.
अशाच एका (कंपनीचे) बॅंकेचे म्हणजे कॅथलिक सिरियन बॅंकेचे शेअर्स तेंव्हा (26 फेब्रु. दरम्यान) वरील लेखात उल्लेख केल्याप्रमाणे साधारणपणे 170 ते 185 रुपयांना मिळत होते ज्याचा आयपीओ मागील महिन्यात म्हणजे 22 नोव्हेंबर ते 26 नोव्हेंबर दरम्यान 195 रुपयांना आला होता. या भागविक्रीस जवळजवळ एकूण 87 पट प्रतिसाद मिळाला होता आणि मागील आठवड्यात 4 डिसेंबर रोजी या बॅंकेच्या शेअर्सची नोंदणी 275 रुपयांवर होऊन त्याचा भाव 313 रुपयांच्यापल्याड देखील जाऊन आला.
म्हणजेच आयपीओच्या किंमतपट्ट्यापेक्षा 60.51 टक्के अधिक, तर प्राथमिक भागविक्रीच्या आधी घेणाऱ्यांस (रु. 170) तब्बल 84% नफा केवळ कांही महिन्यांतच. असे अजूनही कांही सुपरशेअर्स बाजारात उपलब्ध आहेत. उदा. रिलायन्स रिटेल, एचडीबी, इ.