पिंपरी – वीज, पाणी या मूलभूत सुविधांसह सुसज्ज रस्ते, उड्डाणपूल, आयटी पार्क, शैक्षणिक संस्था यामुळे पिंपरी-चिंचवड शहर नागरिकांच्या दृष्टीने आकर्षणाचा केंद्रबिंदू ठरत आहे. याचाच परिणाम म्हणून गेल्या सात वर्षांत शहरातील मिळकतींची अर्थात इमारती, घरे यांची संख्या दिवसेंदिवस वाढत आहे. साडेचार लाखांवरून या मिळकती सहा लाखांवर पोहोचल्या आहेत. तर गेल्या वर्षभरात शहरात 26 हजार 628 मालमत्तांची भर पडली आहे.
शहराची लोकसंख्या सुमारे 30 लाखांवर पोहोचली आहे. केंद्र सरकारच्या जवाहरलाल नेहरू राष्ट्रीय नेहरू अभियानांतर्गत (जेएनएनयुआरएम) शहरात मोठ्या प्रमाणावर विकासकामे झाली आहेत. सुसज्ज रस्ते, उड्डाणपूल शहराची ओळख बनली आहे. शहरात पायाभूत सुविधा उत्तम दर्जाच्या आहेत. शहराच्या विविध भागात झालेले उद्याने, क्रीडांगणे, जलतरण तलाव यासह महापालिकेने उभारलेल्या वैविध्यपूर्ण प्रकल्पांमुळे हा परिसर नागरिकांच्या दृष्टीने आकर्षणाचा केंद्रबिंदू झाला आहे. त्यामुळे दरवर्षी हजारो नव्या इमारतींची भर पडत आहे. सन 2017 मध्ये शहरात 4 लाख 50 हजार 761 मालमत्ता होत्या. सध्या 5 लाख 97 हजार 785 मालमत्ता आहेत. यावरून शहराच्या वाढीचा आलेख लक्षात येत आहे.
पिंपरी-चिंचवड औद्योगिक परिसरालगतच हिंजवडी आयटी पार्क, तळवडे आयटी पार्क, चाकण, रांजणगाव एमआयडीसी हा भाग येतो. या भागात अनेक बहुराष्ट्रीय कंपन्या आहेत. संपूर्ण देशभरातून या भागात कामगार वर्ग रोजगारानिमित्त वास्तव्यास येत आहे. मात्र, या भागात अंतर्गत रस्ते, पाणी, वीज अशा मूलभूत सुविधा अद्यापही अपुऱ्या आहेत. त्यामुळे येथील कामगार वर्ग पिंपरी-चिंचवड शहरात वास्तव्यास प्राधान्य देतो. याचाच परिणाम आयटी पार्क आणि एमआयडीसीलगतच्या पिंपरी-चिंचवड महापालिका हद्दीत बांधकामांचे प्रमाण वाढले आहे. गुंठा, दोन गुंठा जागा घेऊन शहरात बांधकाम करण्याचे प्रमाण मोठे आहे.
ग्रामीण भागात मिळकतींचे वाढते प्रमाण
महापालिकेत 25 वर्षांपूर्वी समाविष्ट झालेला मामुर्डी, रावेत, किवळे, पुनावळे, मोशी, चऱ्होली, दिघी, वडमुखवाडी, चोविसावाडी, डुडुळगाव, चिखली या ग्रामीण भागाचा गेल्या काही वर्षांत सर्वांगीण विकास होताना दिसून येत आहे. रस्ते, पाणी, वीज या मूलभूत सुविधा उपलब्ध होऊ लागल्या आहेत. त्यामुळे या भागात मोठ्या प्रमाणात गृह संकुले उभे राहत आहेत. याशिवाय अर्धा, एक गुंठा जागेत घरे बांधणाऱ्यांचे प्रमाणही मोठे आहे. शहरात 2017 मध्ये निवासी, औद्योगिक, मोकळी जागा अशा साडेचार लाख मिळकती होत्या. सात वर्षांत औद्योगिक मिळकतीसह निवासी मिळकतींच्या संख्येमध्ये मोठी वाढ झाली असून दीड लाख मिळकती वाढल्या आहेत. त्यामुळे महापालिकेच्या उत्पन्नातही दिवसेंदिवस वाढ होत आहे.