नवी दिल्ली : देशात गॅझेटचा वापर मोठ्या प्रमाणात वाढला आहे. मोबाईलसह, लॅपटॉप आणि टॅबलेटच्या चार्जरचा भार अनेकांना सांभाळावा लागतो. मात्र आता या सर्व कटकटीपासून सुटका होणार आहे. कारण मोबाईल, लॅपटॉपसाठी आता एकाच पद्धतीच्या चार्जरचा वापर सुरू होणार आहे. या गॅझेटच्या चार्जिंगसाठी ‘युएसबी-सी’चा वापर करण्यात येणार आहे. संबंधितांवनी या निर्णयावर सहमती दर्शवली आहे. या निर्णयामुळे ग्राहकांना मोठा दिलासा मिळणार आहे.
ग्राहक विभागाचे सचिव रोहित कुमार सिंह यांनी याबाबतची माहिती देताना सांगितले की, एका बैठकीत संबंधितांनी स्मार्ट डिव्हाइससाठी एक कॉमन चार्जिंग पोर्टवर सहमती दर्शवली आहे. त्यामुळे आता कॉमन चार्जिंग पोर्टचा मार्ग मोकळा झाला आहे. कमी किंमतीमधील फीचर फोनसाठी एक वेगळा पोर्ट असू शकतो, अशी माहिती आहे.
केंद्र सरकारने बोलावलेल्या बैठकीत मोबाईल उत्पादक कंपन्यांचे प्रतिनिधी, व्यापार संघटना, औद्योगिक संघटनांचे प्रतिनिधी, आयआयटीचे अधिकारी, केंद्र सरकारच्या विविध खात्यांचे अधिकारी उपस्थित होते. मात्र, हा निर्णयाची अंमलबजावणी कधीपासून सुरू होईल, याबाबत स्पष्ट करण्यात आले नाही.
एकाच पद्धतीच्या चार्जरमुळे ई-वेस्ट कमी होणार आहे. ASSOCHAM-EY च्या एका अहवालानुसार, वर्ष 2021 मध्ये भारतात 5 दशलक्ष टन ई-कचरा तयार होतो. सर्वाधिक ई-कचरा असणाऱ्या देशांच्या यादीत चीन आणि अमेरिकेनंतर भारताचा क्रमांक लागतो. टॅबलेट, स्मार्टफोन आणि लॅपटॉपसाठी यूएसबी टाईप-सी चार्जिंग पोर्टचा वापर करणाऱ्या संबंधितांची मान्यता मिळाली. तर, कमी किंमतीमधील फीचर फोन्सना यातून वगळण्यात आले आहे.