पिंपरी – पिंपरी-चिंचवड महापालिकेतील सत्ताधारी भाजपचे नगरसेवक लक्ष्मण उंडे यांचे आज (शनिवारी) करोनामुळे निधन झाले आहे. चिंचवड येथील एका खासगी रुग्णालयात त्यांनी अखेरचा श्वास घेतला. त्यांची महिनाभरापासून मृत्यूशी झुंज सुरू होती. ती अखेर आज संपली.
प्रभाग क्रमांक चार दिघी-बोपखेलमधून अनुसूचित जमाती प्रवर्गातून लक्ष्मण उंडे भाजपच्या चिन्हावर निवडून आले होते. पहिल्यांदाच ते निवडून आले होते. त्यांनी स्थायी समितीचे सदस्य म्हणून काम केले आहे. ते लष्करी सेवेतून निवृत्त झाले होते. त्यांना महिन्याभरापूर्वी करोनाची लागण झाली होती.
त्यांच्यावर चिंचवड येथील एका खासगी रुग्णालयात आयसीयूमध्ये त्यांच्यावर उपचार सुरू होते. त्यांची तब्येत खालावल्याने त्यांना व्हेंटिलेटरवर ठेवण्यात आले होते. आज त्यांनी अखेरचा श्वास घेतला. त्यांना मधुमेह देखील होता.
करोनाने घेतला तीन विद्यमान नगरसेवकांचा बळी
करोनाने शहरातील तीन विद्यमान नगरसेवकांचा बळी घेतला आहे. माजी विरोधी पक्षनेते, राष्ट्रवादी काँग्रेसचे जेष्ठ नगरसेवक दत्ता साने, जावेद शेख आता भाजपचे नगरसेवक लक्ष्मण उंडे यांचे करोनामुळे निधन झाले आहे. तसेच माजी महापौर रंगनाथ फुगे, माजी नगरसेवक साहेबराव खरात, एकनाथ थोरात, लक्ष्मण गायकवाड या चार माजी नगरसेवकांचे देखील करोनामुळे निधन झाले आहे.