Most Expensive Players of IPL 2024 : आयपीएलच्या पुढील हंगामासाठी म्हणजेच आयपीएल 2024 चा लिलाव 19 डिसेंबर रोजी दुबईमध्ये होणार आहे. दरवेळेप्रमाणे या वेळीही लिलावात काही खेळाडूंवर मोठ्या रकमेचा पाऊस पडेल अशी अपेक्षा आहे. मात्र, यावेळी नुकत्याच पार पडलेल्या विश्वचषकात चांगली कामगिरी करणाऱ्या खेळाडूंवर प्रत्येक फ्रँचायझी आणि संघाचे प्रशिक्षक निश्चितपणे लक्ष ठेवतील.
हे 3 खेळाडू रातो-रात होतील करोडपती…
यावेळी विश्वचषक भारतात झाला आणि जगभरातील खेळाडू वेगवेगळ्या भारतीय खेळपट्ट्यांवर क्रिकेट खेळले. त्यामुळे भारतात होणाऱ्या आयपीएलच्या पुढील मोसमासाठी प्रत्येक संघाला विश्वचषकात चांगली कामगिरी करणाऱ्या खेळाडूंचा आपल्या संघात समावेश करायचा आहे. अशा परिस्थितीत या विश्वचषकात अप्रतिम कामगिरी करणारे तीन खेळाडू आहेत आणि १९ डिसेंबरला या तिन्ही खेळाडूंवर पैशांचा पाऊस पडणार आहे यात शंका नाही.
यामध्ये ऑस्ट्रेलियाचा ट्रॅव्हिस हेड, न्यूझीलंडचा रचिन रवींद्र आणि दक्षिण आफ्रिकेचा जेराल्ड कोएत्झी यांच्या नावांचा समावेश आहे. या तिघांनी या विश्वचषकात अप्रतिम कामगिरी केली आहे, त्यामुळे आयपीएल लिलावादरम्यान हे खेळाडू एका रात्रीत करोडो रुपयांचे मालक बनू शकतात. जाणून घेऊया, हेच तीन खेळाडू का ते…
ट्रॅव्हिस हेड : ऑस्ट्रेलियाचा सलामीचा फलंदाज ट्रॅव्हिस हेडने या विश्वचषकात केवळ 6 सामने खेळले, परंतु त्या 6 सामन्यांमध्ये त्याने 54.83 च्या सरासरीने आणि 127.51 च्या उत्कृष्ट स्ट्राईक रेटने 329 धावा केल्या. या कालावधीत, त्याने 2 शतके आणि 1 अर्धशतक झळकावले आणि त्याची सर्वोत्तम खेळी म्हणजे 137 धावा, जी विश्वचषकाच्या अंतिम सामन्यात भारताविरुद्ध खेळली गेली. त्याचवेळी त्याने उपांत्य फेरीच्या सामन्यात अर्धशतक झळकावून आपल्या संघाला विजयाकडे नेले. हेडने गोलंदाजीतही अनेकवेळा महत्त्वाच्या वेळी विकेट्स घेतल्या, ज्याने संघाच्या विजयात भूमिका बजावली. हेडने आपल्या कामगिरीने सिद्ध केले आहे की तो एक प्रभावशाली आणि मॅचविनर खेळाडू आहे.
रचिन रवींद्र : न्यूझीलंडचा युवा फलंदाज रचिन रवींद्र या विश्वचषकात सर्वाधिक धावा करणाऱ्या यादीत चौथ्या क्रमांकावर होता. त्याने 10 सामन्यात 64.22 च्या सरासरीने आणि 106.44 च्या स्ट्राईक रेटने एकूण 578 धावा केल्या. या काळात त्याने 3 शतके आणि 2 अर्धशतकेही झळकावली. याशिवाय रचिन हा एक फिरकी अष्टपैलू खेळाडू आहे, त्यामुळे त्याने गोंलदाजीत आपल्या संघासाठी 5 विकेट्स घेतल्या. त्यामुळे अनेक संघ भारतीय वंशाच्या या शानदार अष्टपैलू खेळाडूच्या मागे लागणार आहेत.
जेराल्ड कोएत्झी : आयपीएलमध्ये प्रत्येक संघाला नेहमीच अचूक लाईन आणि लेन्थवर गोलंदाजी करणारा वेगवान गोलंदाज हवा असतो, परंतु परदेशी खेळपट्ट्यांवर चमकदार कामगिरी करणारे जगभरातील वेगवान गोलंदाज आयपीएल दरम्यान भारतीय खेळपट्ट्यांवर तितकेसे प्रभावी ठरत नाहीत. पण यावेळी दक्षिण आफ्रिकेचा हा युवा गोलंदाज जेराल्ड कोएत्झीने भारतीय खेळपट्ट्यांवर आपल्या वेगवान गोलंदाजीने सर्वांना प्रभावित केले आहे. तो या एकदिवसीय विश्वचषकात सर्वाधिक बळी घेणारा पाचवा गोलंदाज होता. त्याने 8 सामन्यात 19.80 च्या सरासरीने आणि 6.23 च्या इकॉनॉमी रेटने एकूण 20 विकेट्स घेतल्या आणि 44 धावांत 4 बळी ही त्याची सर्वोत्तम गोलंदाजी आहे.