नवी दिल्ली: करोना विषाणूच्या उत्पत्तीचे कारण शोधणे आणि करोना विषाणूच प्रादुर्भाव रोखण्यासाठी जगभर केल्या गेलेल्या प्रयत्नांचे मूल्यमापन करण्यासाठी जागतिक आरोग्य संघटनेने आयोजित केलेल्या 120 देशांच्या परिषदेत भारत सहभागी झाला आहे. जागतिक आरोग्य संघटनेंतर्गत जागतिक आरोग्य परिषदेच्या 73 व्या सत्राला आजपासून जिनिव्हामध्ये सुरुवात झाली.
करोनाची उत्पत्ती चीनमधील वुहान शहरातूनच झाली, असा आरोप अमेरिकेचे अध्यक्ष डोनाल्ड ट्रम्प यांनी यापूर्वी अनेकदा केला आहे. अमेरिकेचा हा दावा चीनने फेटाळला आहे. चीनवर अनेक देशांकडून असाच आरोप केला जात असतानाच ही जागतिक परिषद होत आहे. या परिषदेच्या निमित्ताने करोनाच्या जागतिक साथीशी संबंधित अन्य मुद्द्यांवरही चर्चा केली जाण्याची शक्यता आहे. केंद्रीय आरोग्यमंत्री हर्षवर्धन हे व्हिडीओ कॉन्फरन्सच्या माध्यमातून या परिषदेमध्ये सहभागी होणार आहेत.
करोनाच्या साथीमुळे जगभरात आतापर्यंत 3 लाख 10 जणांचा मृत्यू झाला आहे तर 47 लाख जणांना या रोगाची बाधा झाली आहे. करोनाच्या साथीमुळे जगभरातील अर्थकारणाची समीकरणेही बिघडली आहेत.
जागतिक आरोग्य संघटनेच्या समन्वयातून कोविड-19 च्या संदर्भात जगभरात केल्या गेलेल्या उपाय योजनांचे निःपक्षपाती, तटस्थ, सर्वंकष आणि टप्प्याटप्प्याने मूल्यमापन करावे, अशा मागणीचा युरोपीय संघाने केलेल्या ठरावाला अनेक देशांच्या पाठिंब्याने या परिषदेत मांडण्यात आला.
या ठरावाला भारताव्यतिरिक्त ऑस्ट्रेलिया, बांगलादेश, बेलारूस, भूतान, ब्राझील, कॅनडा, चिली, कोलंबिया, जिबूती, डोमिनिकन रिपब्लिक, इक्वाडोर, अल साल्वाडोर, ग्वाटेमाला, गयाना, आईसलॅंड, इंडोनेशिया, जपान, जॉर्डन, कझाकस्तान, मलेशिया, मालदीव आणि मेक्सिको आदी देशांनी पाठिंबा दिला आहे.
मॉन्टेनेग्रो, न्यूझीलंड, उत्तर मॅसेडोनिया, नॉर्वे, पराग्वे, पेरू, कतार, कोरिया प्रजासत्ताक, मोल्डोवा, रशिया, सॅन मारिनो, सौदी अरेबिया, ट्युनिशिया, तुर्की, युक्रेन, ब्रिटन आणि उत्तर आयर्लंड या देशांनीही या ठरावाला पाठिंबा दिला आहे. मात्र या ठरावाला पाठिंबा देणाऱ्या देशांच्या यादीत अमेरिकेचे नाव नाही.
“डब्लूएचओ’च्या आपत्कालीन कार्यक्रमांतर्गत जागतिक साथीवर नियंत्रण आणण्याची उपाययोजना करण्याची शिफारसही या ठरावाद्वारे केली गेली आहे. “वर्ल्ड ऑर्गनायजेशन फॉर ऍनिमल हेल्थ’, फूड ऍग्रीकल्चर ऑर्गनायजेशन आदी संघटनांबरोबर मिळून करोना विषाणूच्या उत्पत्तीचा स्रोत शोधण्याची मागणीही या ठरावाद्वारे केली गेली आहे. करोनासारखी साथ भविष्यात पसरू नये यासाठी वैज्ञानिक आणि संलग्न अभियानांतर्गत आवश्यक उपाययोजना करण्यात याव्यात आणि संशोधन उद्दिष्टे निश्चित केली जावी, असेही या ठरावात म्हटले आहे.
“डब्ल्यूएचओ’मध्ये तैवानचा समावेश करण्यात यावा, यासाठी ट्रम्प प्रशासनाने केलेल्या धडपडीवरून चीन आणि अमेरिका यांच्यात तणाव निर्माण झाला आहे. हा मुद्दाही या परिषदेच्या केंद्रस्थानी आहे.