शिवसेनेत उभी फूट; आमदार अनिल राठोड यांना धक्का
येवलेंना 10, तर शिंदेंना मिळाली 52 मते : जिल्हा नियोजन समितीच्या रिक्त जागांचा निकाल
नगर – जिल्हा नियोजन समितीमधील रिक्त असणाऱ्या मनपा प्रवर्गातील दोन जागांसाठी आज मतमोजणी होवून शिवसेना व राष्ट्रवादी यांना प्रत्येकी एक जागा मिळाली आहे. शिवसेनेचे नगरसेवक अनिल शिंदे व राष्ट्रवादीचे नगरसेवक विनीत पाऊलबुधे हे विजयी झाले आहेत. हा निकाल नगर शहर शिवसेनेत उभी फूट पडल्याचे स्पष्ट करीत असून हा शिवसेनेचे उपनेते माजी आमदार अनिल राठोड यांना मोठा धक्का समजला जातोय.
जिल्हा परिषदेची एक, महापालिकेच्या तीन व लहान नागरी क्षेत्राची म्हणजे नगरपालिकेची एक, अशा एकूण पाच रिक्त जागांसाठी जिल्हा नियोजन समितीची निवडणूक होणार होती; मात्र, यापैकी तीन जागा बिनविरोध झाल्या होत्या. त्यामुळे मंगळवारी महापालिकेच्या उर्वरीत दोन जागांसाठी मतदान घेण्यात आली. या निवडणुकीत मतदारांची संख्या 67 होती. मतदारांमध्ये शिवसेनेचे 23, राष्ट्रवादीचे 18, भाजपचे 14, कॉंग्रेसचे 5, बसपचे 4, समाजवादी पक्षाचा 1 आणि अपक्ष 2 नगरसेवक होते.
महापालिकेच्या सर्वसाधारण प्रवर्गातील एका जागेसाठी अमोल येवले आणि अनिल शिंदे या शिवसेनेच्याच दोन नगरसेवकांमध्येच लढत झाली. हे दोन नगरसेवक आमने-सामने निवडणुकीच्या रिंगणात आल्यामुळे शिवसेनेत फूट पडल्याचे चित्र होते. त्यातच अमोल येवले हे माजी आमदार अनिल राठोड यांचे समर्थक समजले जातात. त्यामुळे त्यांना किती मते पडणार, त्यावरून राठोड समर्थक की विरोधक यापैकी कोणत्या गटाची ताकद शहरामध्ये वाढली आहे, हे स्पष्ट होणार असल्याने या निकालाकडे नगरकरांचे लक्ष लागले होते.
अखेर गुरुवारी मतमोजणी झाल्यानंतर निकाल जाहीर केला असून येवले यांना अवघे 10 मते मिळाली असून त्यांच्या विरोधात असणारे अनिल शिंदे यांना तब्बल 52 मते मिळाली आहे. 5 मते अवैध ठरली असून सर्वसाधारण प्रवर्गाच्या जागेवर शिंदे यांची वर्णी लागली आहे.
महापालिकेत शिवसेनेचे 23 नगरसेवक असताना येवले यांना केवळ 10 मते मिळाल्यामुळे हा राठोड यांना मोठा धक्का समजला जातोय. तर, महापालिकेच्या नागरिकांचा मागास प्रवर्गातील जागेसाठी शिवसेनेच्या नगरसेविका सुवर्णा जाधव व राष्ट्रवादी कॉंग्रेसचे नगरसेवक विनित पाऊलबुधे यांच्यात लढत झाली. जाधव यांना केवळ 15 मते पडली आहे. तर, 4 मते अवैध ठरली असून पाऊलबुधे यांना 48 मते पडली आहेत.
शिवसेनेला बंडाची जखम
विधानसभा निवडणुकीपासूनच शहर शिवसेनेला बंडाची लागण झाली होती. ती नियोजनच्या निवडणुकीत पुन्हा अधोरेखित झाली. शिवसेनेचा एक नगरसेवक अपात्र ठरल्याने सेनेचे 23 नगरसेवक होते. असे असताना पण राठोड समर्थक येवले यांना केवळ 10,तर जाधव यांना 15 मते मिळाली. दोन्ही ठिकाणी सेनेची मते पुटली हे उघड आहे.आता भविष्यात याचे पडसाद नगर शहराच्या राजकारणात कसे उमटतात हे लवकरच दिसेल.