ICC ODI World Cup 2023 India vs South Africa Virat Kohli Birthday : विश्वचषक 2023 च्या 37 व्या सामन्यात आज भारताचा सामना दक्षिण आफ्रिकेशी होत आहे. कोलकाता येथील ईडन गार्डन्सवर भारतीय कर्णधार रोहित शर्माने नाणेफेक जिंकून प्रथम फलंदाजी करण्याचा निर्णय घेतला. गुणतालिकेत भारत पहिल्या तर दक्षिण आफ्रिका दुसऱ्या स्थानावर आहे.
IND Vs SA Live Score : विराट कोहलीचे अर्धशतक
विराट कोहलीने 67 चेंडूत आपले अर्धशतक पूर्ण केले आहे. त्याने त्याच्या वाढदिवशी शानदार खेळी केली आहे आणि कठीण खेळपट्टीवर टीम इंडियाला चांगल्या स्थितीत आणलं आहे. त्याने अय्यरसोबत शानदार भागीदारी केली आहे. 30 षटकांनंतर भारताची धावसंख्या 2 बाद 179 आहे.
आता प्रतीक्षा शतकाची…
विराट कोहलीच्या अर्धशतकी खेळीनंतर आता क्रिकेट चाहत्यांना त्याच्या शतकाची विशेष म्हणजे 49 शतकाची प्रतीक्षा आहे. सचिन तेंडुलकरच्या वनडेतील 49 शतकाच्या विक्रमाशी बरोबरी करण्यापासून तो एक शतक दूर आहे. विराटने त्याच्या वाढदिवशी या विक्रमाशी बरोबरी केली तर चाहत्यांसाठी ती भेटवस्तूपेक्षा कमी नसेल. विराटच्या नावावर आतापर्यंत 48 वनडे शतके आहेत.
विराट वाढदिवसाच्या दिवशी शतक करू शकेल का?
विराटच्या यंदाच्या वनडेतील विक्रमाबद्दल बोलायचे झाले तर त्याने 23 सामन्यांच्या 20 डावांमध्ये 65.88 च्या सरासरीने 1054 धावा केल्या आहेत. यामध्ये चार शतके आणि सहा अर्धशतकांचा समावेश आहे. नाबाद 166 ही त्याची सर्वोत्तम धावसंख्या होती. या विश्वचषकात आतापर्यंत विराटने 85 धावा, नाबाद 55, 16 धावा, नाबाद 103, 95 धावा, शून्य आणि 88 धावा अशा खेळी केल्या आहेत.
वाढदिवशी शतक झळकावणारे खेळाडू (ODI Cricket)
टॉम लॅथम -140* विरुद्ध नेदरलँड्स (02/04/2022)
रॉस टेलर -131* विरुद्ध पाकिस्तान (08/03/2011)
सनथ जयसूर्या -130 विरुद्ध बांगलादेश (30/06/2008)
मिचेल मार्श -121 विरुद्ध पाकिस्तान (20/10/2023)
सचिन तेंडुलकर -134 विरुद्ध ऑस्ट्रेलिया (24/04/1998)
विनोद कांबळी -100* विरुद्ध इंग्लंड (18/01/1993)
जर त्याने आज शतक केले तर तो एकदिवसीय क्रिकेटमध्ये त्याच्या वाढदिवशी शतक ठोकणारा सातवा खेळाडू ठरेल. टॉम लॅथम, रॉस टेलर, सनथ जयसूर्या, मिचेल मार्श, सचिन तेंडुलकर आणि विनोद कांबळी यांनी यापूर्वी ही कामगिरी केली आहे.
