पुणे – शहरातील गणेश विसर्जन मिरवणुकीत चोरट्यांनी अनेकांचे मोबाइल चोरले आहेत. लक्ष्मी रस्त्यासह अन्य मार्गावर आणि गणेशोत्सवात मंडळ परिसरात गर्दीच्या ठिकाणी तब्बल 1,100 पेक्षा अधिक मोबाइल चोरीस गेल्याच्या तक्रारी पोलिसांकडे आल्या आहेत. गुरुवारी लक्ष्मी रस्ता, टिळक रस्ता, कुमठेकर रस्ता, केळकर रस्ता परिसरात मुख्य विसर्जन मिरवणूक पाहण्यासाठी आलेल्या नागरिकांचे मोबाइल चोरट्यांनी लंपास केले.
पुणे पोलिसांच्या “लॉस्ट अँड फाउंड’ या ऑनलाइन पोर्टलवर अशा तब्बल अकराशेवर तक्रारी करण्यात आल्या आहेत. विश्रामबाग, खडक, फरासखाना पोलीस ठाण्यांच्या हद्दीत मोबाइल चोरीला गेल्याच्या सर्वाधिक तक्रारी दाखल झाल्या आहे. नुकतेच हडपसर पोलिसांनी नागरिकांचे मोबाइल चोरणाऱ्या झारखंडमधील चोरट्यांच्या दोन टोळ्या जेरबंद करून त्यांच्याकडून 72 मोबाइल जप्त केले आहे.
एकाला अटक, तिघे अल्पवयीन ताब्यात
विसर्जन मिरवणुकीत 70 हजार रुपयांचा मोबाइल चोरणाऱ्याला फरासखाना पोलिसांनी अटक केली आहे. ही घटना शिवाजी रस्त्यावर घडली. चंदनकुमार मनोकामना पासदान (25, रा. मोशी) असे चोरट्याचे नाव आहे. याप्रकरणी शुभम पायमोडे (27, रा. धनकवडी) यांनी फरासखाना पोलीस ठाण्यात तक्रार दाखल केली आहे.
शुभमला चोरट्याची हालचाल लक्षात येताच, त्याने त्याला पकडले. दुसऱ्या गुन्ह्यात विश्रामबाग पोलिसांनी तीन अल्पवयीन आरोपींना ताब्यात घेऊन त्यांच्याकडून आठ मोबाइल जप्त केले. ते कर्नाटकातील आहेत.