नवी दिल्ली : देशात कोरोनाचा प्रादुर्भाव वाढला असल्याने लॉकडाऊनचा कालावधी वाढवण्यात आला आहे. दरम्यान, सराफा बाजारात लॉकडाऊनमुळे मंदी आली होती. मात्र अक्षयतृतीयेच्या मुहूर्तावर ही सोनेखरेदी आता सराफा बाजाराऐवजी ऑनलाईन सुरू झाली आहे. अक्षय्य तृतीयाच्या मुहुर्तावर सोनेखरेदी करण्यासाठी लोकांनी ऑनलाईन पोर्टल्सवर गर्दी केली आहे. त्यामुळे ऑनलाईन सोनेखरेदीच्या प्रमाणात ८ टक्क्यांची वाढ झाली आहे.
लॉकडाऊनमुळे सोने-चांदी विक्री करणारी सगळी दुकाने बंद असल्याने बाजारात मंदी आहे. त्यातच सोन्या-चांदीच्या दरांमध्येही सातत्याने चढ-उतार होत आहेत. पण असं असतानाही ऑनलाईन सोनेखरेदीला चांगला प्रतिसाद मिळत असल्याचे पहायला मिळत आहे. त्यातच अक्षय्यतृतीया येत असल्याने येत्या दोन-तीन दिवसांमध्ये हा प्रतिसाद आणखी वाढणार असल्याचा अंदाज तज्ज्ञ व्यक्त करत आहेत.
ऑगमाँट ही कंपनी ऑनलाईन सोने-चांदी खरेदीच्या क्षेत्रात काम करत आहे. जवळपास २ अब्ज अमेरिकन डॉलर्सची उलाढाल असलेल्या या कंपनीच्या विक्रीत गेल्या महिन्याभरात ८ टक्क्यांची वाढ झाली आहे. भारतीय संस्कृतीत सोन्याचे दागिने आणि सोने याला अनन्यसाधारण महत्त्व आहे. त्यात अक्षय्य तृतीयेच्या मुहुर्तावर सोनेखरेदी करण्यावर लोकांचा भर असतो.
भारतात ग्राहक चार ते पाच हजार रुपयांच्या किमतीची सोन्याची नाणी किंवा बिस्किटं घेण्याला पसंती देतात. लॉकडाऊन सुरू झाल्यापासून सोनेव्यापार थंडावला होता. पण अक्षय्य तृतीया जवळ आल्यापासून ऑनलाईन सोनेखरेदीने जोर पकडला आहे.