कोलकाता – बेकायदेशीर कोळसा खाणींबाबतच्या तपासाचा भाग म्हणून सीबीआयने काल कोलकात्यात पाच ठिकाणी छापे घातले. सीबीआयच्या प्रवक्त्यांनी मंगळवारी ही माहिती दिली. छापा घातलेल्या पाच ठिकाणांपैकी एक ठिकाण हे एका उद्योगपतीचे निवासस्थान आहे.
हे उद्योगपती अनुप मांझी उर्फ लाला या एका आरोपीचे निकटवर्तीय आहेत. लालाविरोधात सीबीआयच्यावतीने लुकआऊट नोटीस बजावण्यात आली आहे, असेही या प्रवक्त्याने सांगितले.
बेकायदेशीर कोळसा खाणींवर आणि कोळशाच्या चोरीवर काय कारवाई केली, त्याचा तपशील सादर करावा, अशी सूचना सीबीआयने ईस्टर्न कोलफिल्डला केली आहे.
या प्रकरणी मांझी याची चौकशी महत्वाची असून त्याचा शोध घेतला जात आहे. सीबीआयने या प्रकरणाच्या तपासाचा भाग म्हणून 28 नोव्हेंबरला तब्बल 45 ठिकाणी छापे घातले होते. त्यामध्ये 25 ठिकाणे पाश्चिम बंगालमधील होती.