पळसदेव -इंदापूर तालुक्यातील उजनी जलाशयावरील वातावरण फ्लेमिंगोसाठी आनंददायी ठरले आहे. करोनामुळे गेल्या दीड महिन्यापासून पक्षी पर्यटन ठप्प झाले आहे. विणीचा हंगाम अंतिम टप्प्यात असलेल्या हजारो पक्ष्यांचे उजनी काठी जणू मुक्त सम्मेलनच भरल्याचे चित्र आहे. युरोप व कच्छच्या रणातून हे दिमाखदार, लोभसवाण्या रुपाचे हजारो परदेशी पक्षी चार महिन्यांच्या वास्तव्यानंतर विणीचा हंगाम संपवून मे महिन्यात आपल्या मूळस्थानी परतत असतात, परंतु यंदा थंडी पडण्याअगोदरच हजारोंच्या संख्येने येऊन दाखल झालेले फ्लेमिंगोंचा मुक्त संचार याठिकाणी सुरू आहे.
उजनी जलाशय परिसर पक्षांनी गजबजला आहे . थंडीची चाहूल लागली की, ऑक्टोबर – नोव्हेंबर महिन्यांमध्ये पुणे – सोलापूर जिल्ह्यातील उजनीच्या पाणलोट क्षेत्रासह भिगवण परिसरातील डाळज, डिकसळ, कोंढार चिंचोली या भागात वास्तव्य करतात. गेल्या वर्षी चांगला पाऊस झाला असल्यामुळे जिल्ह्यात इतरत्र विखरलेले फ्लेमिंगो मार्च-एप्रिल मध्ये उजनी जलाशयावर एकवटले असून पक्ष्यांचा विणीचा हंगाम सध्या अंतिम टप्प्यात आहे. सध्या आढळणाऱ्या फ्लेमिंगोंच्या समूहात त्यांच्या लहान पिल्लांची संख्या वाढत आहे.
मासेमारी करण्यासाठी परवानगी आहे मात्र मार्केट सुरु नसल्याने अल्प प्रमाणात मासेमारी सुरु आहे. त्यामुळे पक्ष्यांसाठी मोठ्या प्रमाणात खाद्य उपलब्ध होत आहे. शिवाय पक्षी पर्यटनदेखील बंद असल्याने मानवी हस्तक्षेप कमी आहे. त्यामुळे उजनी जलाशयाच्या पाणलोट क्षेत्रातील काही ठिकाणी या पक्ष्यांना आल्हाददायक वातावरण आहे. त्याचा परिणाम म्हणून पक्ष्यांचा वावर याठिकाणी अजूनही पाहावयास मिळत आहे.
याठिकाणी फ्लेमिंगो, कंठेरी चिखल्या, चक्रवाक बदक, नदीसुरय, तुतवार, जांभळी पाणकोंबडी, पांढरा मानेचा करकोचा, शराटी, पाणकावळा, थापट्या, हळदीकुंकू बदक, तपकिरी डोक्याचा कुरव, थापट्या, राखी बगळा अशा प्रजातींचे पक्षी पाणथळ व पाणगवतांच्या जागा अशी त्यांच्या पसंतीची स्थळे शोधत उजनी जलाशयावरील पाहुणचार घेत आहेत.