नवी दिल्ली : राष्ट्रवादीच्या खासदार सुप्रिया सुळे यांचा लोकसभेत चर्चेदरम्यानचा एका व्हिडीओ सध्या चर्चेचा विषय बनला आहे. कारण या चर्चेदरम्यान सुळेंची जीभ घसरली आणि त्यांनी केंद्रीय मंत्री किरेन रिजिजू आपल्यात नाहीत, असे म्हटले. त्यांच्या या वक्तव्याची माहिती जेव्हा रिजिजू यांना झाली तेंव्हा त्यांनी मजेशीर उत्तर देत आपण अजूनही जिवंत असल्याचे सांगितले.
सुप्रिया सुळे यांनी काल लोकसभेत किरेन रिजिजूंचे कौतुक केले, पण ही स्तुती तेव्हाची होती जेव्हा रिजिजू क्रीडा राज्यमंत्री होते. हेच सांगताना सुप्रिया सुळे यांनी चूक केली आणि रिजिजू आता मंत्रालयात नाहीत, असं म्हणण्याऐवजी केंद्रीय मंत्री राहिले नाहीत, असं म्हटलं. त्यानंतरही त्यांचं बोलणं सुरू होतं, परंतु त्यांना त्यांची चूक लक्षात आली नाही.
I am very much alive and performing my duty @supriya_sule Ji..
Lighter note apart, thank you for the pleasant words because the spirit of sports transcend beyond politics and ideology to make one #TeamIndia pic.twitter.com/UsCRf1VBV0— Kiren Rijiju (@KirenRijiju) April 4, 2022
सभागृहात उपस्थित इतर सदस्यांनी याकडे सुप्रियांचे लक्ष वेधले असता त्यांनाही धक्का बसला. त्यांच्या या विधानाची सर्वप्रथम काँग्रेस खासदार गौरव गोगोई यांनी दखल घेतली. रिजिजू आता क्रीडामंत्री राहिलेले नाहीत, असे सांगत काँग्रेस नेत्याने सुळे यांचं विधान दुरुस्त केलं. यानंतर सुळे यांना आपली चूक लक्षात येताच त्यांनी ती सुधारून माफी मागितली.
जेव्हा रिजिजूंना याची माहिती मिळाली तेव्हा त्यांनी ट्विट केले आणि ते म्हणाले की ‘सुप्रियाजी मी अजूनही जिवंत आहे आणि आपले कर्तव्य बजावत आहे.’ दरम्यान, यावेळी सुप्रिया सुळेंनी केलेल्या कौतुकाबद्दल रिजिजू यांनी आभार मानले.