मुंबई – ऐशीच्या दशकातील प्रसिद्ध मालिका ‘रामायण’ आजही लोकांमध्ये पूर्वीइतकीच लोकप्रिय आहे.रामानंद सागर यांच्या ‘रामायण’ मालिकेतील सर्व पात्रे कायमची अजरामर झाली आहेत. या मालिकेत रामाच्या भूमिकेत दिसणारा अरुण गोविल आणि सीतेच्या भूमिकेत दिसलेली दीपिका चिखलिया लोकांमध्ये इतकी लोकप्रिय झाली की आजही प्रेक्षकांनी त्यांना पाहिले की त्यांना खऱ्या रामायणाचीच आठवण येते. त्याबाबतचाच एक किस्सा सध्या समोर आला आहे.
अभिनेता अरुण नुकताच संभाजीनगरला पोहोचला होता. यादरम्यान, अभिनेत्याला विमानतळावर पाहून एक महिला भावूक झाली आणि तिने त्याच्या पाया पडून त्याला नमस्कार केला. या व्हिडीओतील महिलेला पाहून जणू तिला भगवान रामच मिळाले आहेत असं वाटत आहे. एवढेच नाही तर अभिनेत्याला पाहताच महिलेच्या डोळ्यातून अश्रू वाहू लागले. त्याचवेळी, व्हिडिओमध्ये अभिनेता महिलेला उठण्याची विनंती करताना दिसला. यानंतर त्यांनी एकत्र फोटोसाठी पोजही दिली.
अरुण गोविलला पाहून लोकांच्या अशा प्रतिक्रिया येण्याची ही पहिलीच वेळ नाही. याआधीही त्यांच्यासोबत असे अनेकदा झाले आहे. रामायणापासून लोक त्यांना फक्त राम म्हणून पाहतात. ते जरी अभिनेते असले तरी लोक आजही त्यांच्या प्रभू रामचंद्रच शोधतात. चाहत्यांनी यावर कमेंट करत रामानंद सागर यांच्या रामायणाची ही जादू असल्याचे म्हंटले आहे.