सातारा (प्रतिनिधी) – जिल्ह्यात शनिवार, दि. 16 पासून कोविड लसीकरण करण्यात येणार आहे. प्रारंभी 14 हजार 357 आरोग्य कर्मचारी, आशा, अंगणवाडी कर्मचारी व ऍपवरील दहा हजार नोंदणीकृत नागरिकांना ही लस देण्यात येणार आहे. जिल्हा परिषदेच्या कोल्ड स्टेरेजमध्ये ही लस ठेवण्यात येणार आहे.
लस घेतल्यानंतरही सोशल डिटन्सचे पालन, मास्क व सॅनिटायझरचा वापर बंधकारक आहे. नागरिकांना आणखी काही दिवस कोविडच्या नियमांचे पालण करावे लागणार आहे. सातारा येथे क्रांतिसिंह नाना पाटील जिल्हा रूग्णालय व आर्यांग्ल रुग्णालय, कराड उपजिल्हा रुग्णालय व कृष्णा रुग्णालय, फलटण उपजिल्हा रुग्णालय, दहिवडी, खंडाळा, महाबळेश्वर, मेढा व पाटण ग्रामीण रुग्णालय, मायणी मिशन हॉस्पिटल, पुसेगाव, नागठाणे व तरडगाव प्राथमिक केंद्रे या ठिकाणी लसीकरण होणार आहे. प्रारंभी महसूल, पोलीस, शिपाई व सफाई कर्मचाऱ्यांनी कोविड ऍपवर नोंदणी करण्याचे आवाहन करण्यात आले आहे.
प्रारंभी आरोग्य कर्मचारी, आशा व अंगणवाडी कर्मचारी व अन्य, अशा एकूण 25 हजार जणांना लसीचा पहिला डोस देण्यात येणार आहे. त्यानंतर 28 दिवसांनी दुसरा डोस देण्यात येणार आहे, असे जिल्हा आरोग्य अधिकारी डॉ. अनिरुद्ध आठल्ये यांनी सांगितले.