पुणे – करोना प्रतिबंधक लसीकरणाच्या पहिल्या टप्प्यात को-विन ऍपवर नोंदणी केलेल्या शहरातील 56 हजार आरोग्य कर्मचाऱ्यांपैकी सुमारे 31 हजार 690 जणांनीच लसीचा पहिला डोस घेतला आहे.
पहिल्या टप्प्यात को-विन पोर्टलवर नोंदणी केलेल्या आणि अद्याप लस टोचून न घेतलेल्या आरोग्य कर्मचाऱ्यांनी बुधवारपर्यंत लसीकरण करून घेण्याची डेडलाइन दिली आहे. मात्र, अद्याप 56 टक्केच आरोग्य कर्मचाऱ्यांनी लस घेतली असल्याने ही डेडलाइन वाढवण्यात येण्याची शक्यता आरोग्य विभागातील सूत्रांनी व्यक्त केली.
हेल्थकेअर वर्कर्सना बुधवारपासून लस देणे बंद करण्याच्या सूचना राज्याच्या आरोग्य विभागाने स्थानिक स्वराज्य संस्थांना दिले होते. त्यानंतर महापालिकांना त्याविषयीचे पत्र प्रसिद्ध केले.
पुणे महापालिका क्षेत्रात अद्यापही 25 हजार हेल्थकेअर वर्कर्सचे लसीकरण झाले नाही. त्यामुळे केंद्राने आणि राज्याने दिलेली डेडलाइन पाळता येणे प्रत्यक्षात शक्य नसल्याचेही आरोग्य विभागातील सूत्रांनी सांगितले.