मुंबई : आजच्या दिवसभरातील मोठी बातमी आहे. शिवसेनेचे खासदार संजय राऊत यांनी आज राष्ट्रवादी काँग्रेसचे अध्यक्ष शरद पवार यांची भेट घेतली आहे. संजय राऊत हे पवारांना भेटण्यासाठी त्यांच्या मुंबईतील ‘सिलव्हर ओक’ या निवासस्थानी गेले होते. ही एक सदिच्छा भेट असल्याचे म्हटले जात आहे. मात्र या भेटीच्या बातमीनंतर राजकीय वर्तुळात चर्चांना उधाण आले आहे.
राज्यामध्ये सत्तेत असणाऱ्या महाविकास आघाडीतील घटक पक्ष म्हणजेच शिवसेनेची बाजू सातत्याने प्रसार माध्यमांसमोर मांडणारे राऊत आणि राष्ट्रवादीचे सर्वेसर्वा असणाऱ्या पवारांच्या भेटीमध्ये सध्याच्या ज्वलंत विषयांवर चर्चा होण्याची शक्यता आहे. एसटीचा संप, महागाई, इंधन दरवाढ यासारख्या विषयांवर अनौपचारिक चर्चा होण्याची शक्यता आहे.
शरद पवार यांच्यावर करण्यात आलेल्या टीकेवरुन राऊत यांनी मागील काही दिवसांपासून भाजपाच्या काही नेत्यांवर टीका केल्याचेही पहायला मिळाले होते. यामध्ये भाजपाचे प्रदेशाध्यक्ष चंद्रकांत पाटील यांनाही राऊत यांनी पवारांचा एकेरी उल्लेख केल्याबद्दल फटकारले होते.
दोन वर्षांपूर्वी राज्यामध्ये सत्ता स्थापनेच्या घडामोडी सुरु असताना सिलव्हर ओक आणि मातोश्रीवरुन सत्ता स्थापनेच्या चर्चा झाल्याचे पहायला मिळाले होते. त्यामुळेच सध्याच्या परिस्थितीमध्ये महाराष्ट्रातील राजकारणामधील सत्ता केंद्रांपैकी एक असणाऱ्या सिलव्हर ओकमधील बैठकीत राऊत आणि पवारांमध्ये काय चर्चा होते याकडे अनेकांचे लक्ष लागून राहिले आहे.