Share Market News – राष्ट्रीय उत्पन्नाची आशादायक आकडेवारी जाहीर झाल्यानंतर देशातील आणि परदेशातील गुंतवणूकदारांनी शुक्रवारी शेअर बाजारात मोठ्या प्रमाणात खरेदी केल्यामुळे मुंबई आणि राष्ट्रीय शेअर बाजाराचे निर्देशांक ऐतिहासिक उच्चांकी पातळीवर बंद झाले.
परदेशी संस्थागत गुंतवणूकदारांनी काल तब्बल 3,538 कोटी रुपयांच्या शेअरची खरेदी केली. जर अमेरिकेत लवकरच व्याजदर कपात झाली तर हे गुंतवणूकदार भारतात मोठी गुंतवणूक घेऊन येण्याची शक्यता आहे. कारण गेल्या एक वर्षांमध्ये या गुंतवणूकदारांनी भारतातून बरीच गुंतवणूक काढून घेतली आहे.
बाजार बंद होताना मुंबई शेअर बाजाराचा निर्देशांक सेन्सेक्स तब्बल 1,245 अंकांनी म्हणजे 1.72 टक्क्यांनी उसळून 73,745 अंकावर बंद झाला. राष्ट्रीय शेअर बाजाराचा निर्देशांक निफ्टी 355 अंकांनी वाढून 22,338 अंकावर बंद झाला. सेन्सेक्स आणि निफ्टी आज आपल्या ऐतिहासिक उच्चांकी पातळीवर विराजमान झाले.
अमेरिकेतही व्याजदर कपात होण्याची शक्यता निर्माण झाल्यामुळे अमेरिका, युरोप आणि आशियाई शेअर बाजाराचे निर्देशांक वाढले. त्यामुळे परदेशी संस्थागत गुंतवणूकदार भारतीय शेअर बाजारात खरेदी करीत असल्याचे वातावरण आहे.
टाटा स्टील कंपनीचा शेअर सहा टक्क्यांनी वाढला. लार्सन अँड ट्यूबरो, जेएसडब्ल्यू स्टील, टायटन, मारुती, इंडसइंड बँक, आयसीआयसीआय बँक, टाटा मोटर्स या कंपन्यांच्या शेअरच्या भावात वाढ झाली. तर एचसीएल टेक्नॉलॉजी, इन्फोसिस, टेक महिंद्रा या कंपन्यांच्या शेअरच्या भावात घट झाली.
https://wordpress-1295094-4705890.cloudwaysapps.com/india-s-gdp-grows-at-8-4-pc-in-q3-economy-to-expand-at-7-6-pc-in-fy24-govt-data-2024-02-29/
तिसर्‍या तिमाहीत विकासदर 8.4% इतका झाला आहे. त्यामुळे पूर्ण वर्षाचा विकासदर 7% पेक्षा जास्त होणार असल्याचे स्पष्ट झाले आहे. त्याचबरोबर महागाई नियंत्रणात असल्यामुळे व्याजदर कपातीची शक्यता वाढली आहे.
त्यामुळे शेअर बाजारात खरेदीचे वातावरण होते. लवकरच निवडणुका होणार असून पुन्हा भारतीय जनता पक्षाचे सरकार येईल असे बर्‍याच गुंतवणूकदारांना वाटत असल्यामुळे गुंतवणूकदार खरेदी करीत असल्याचे सांगण्यात आले.
