सातारा -माहुली गावातील युवा नेते संतोष भाऊ जाधव आणि त्यांच्या मित्रावर मंगळवारी रात्री साडेआठच्या सुमारास दोघांनी कोयत्याने हल्ला केल्याने मोठी खळबळ उडाली होती. या प्रकारानंतर माहुली परिसरात मोठा पोलीस बंदोबस्त तैनात करण्यात आला होता. एकुण परिस्थिती लक्षात घेता, पोलीस दलाने गतीने चक्रे फिरवत मुख्य संशयिताला मसूर फाटा येथून बारा तासाच्या आत जेरबंद केले आहे. हर्षद संभाजी साळुंखे (वय 21, रा. क्षेत्र माहुली) असे त्याचे नाव आहे.
दरम्यान, हल्ल्यात गंभीर जखमी झालेल्या जाधव यांच्यावर खाजगी रुग्णालयात उपचार सुरू आहेत. जाधव यांच्या मालकीच्या जागेमध्ये टाकलेली पान टपरी काढायला लावली म्हणून दोन इसमांनी त्यांच्याकडे माफी मागण्याच्या बहाण्याने येऊन त्यांच्या कपाळावर डोक्यात तसेच हाताच्या तळव्यावर, त्यांच्या मित्राच्या मनगटावर कोयत्याने गंभीर वार केले. या दोघांनाही येथील खाजगी रुग्णालयात उपचारासाठी दाखल करण्यात आले होते. गुन्ह्याचे गांभीर्य लक्षात घेऊन पोलीस अधीक्षक समीर शेख स्थानिक गुन्हे शाखेचे पोलीस निरीक्षक अरुण देवकर यांना गुन्हा उघडकीस आणण्याच्या सूचना दिल्या होत्या.
स्थानिक गुन्हे शाखेने सहाय्यक पोलीस निरीक्षक रवींद्र बोहरे व पोलीस उपनिरीक्षक अमित पाटील यांच्या अधिपत्याखाली एक पथक तयार करून तात्काळ रवाना केले. हर्षद साळुंखे हा मसूर फाटा येथे शेतात असल्याची गोपनीय माहिती मिळताच पथकाने त्या शेताला घेराव घालून त्यास ताब्यात घेतले.
संबंधित संशयिताला सातारा शहर पोलीस ठाण्याच्या ताब्यात देण्यात आले आहे. या गुन्ह्यातील संशयित 12 तासाच्या जेरबंद केल्याने पोलीस अधीक्षक समीर शेख व अतिरिक्त पोलीस अधीक्षक बापू बांगर यांनी स्थानिक गुन्हे शाखेच्या पथकाचे अभिनंदन केले आहे. या कारवाईत स्थानिक गुन्हे शाखेचे पोलीस निरीक्षक देवकर, सहायक पोलीस निरीक्षक संतोष पवार, रविंद्र भोरे, पोलीस उपनिरीक्षक विश्वास शिंगाडे, अमित पाटील, पोलिस अंमलदार आतिश घाडगे, संतोष सपकाळ, संजय शिर्के, विजय कांबळे, शरद बेबले, प्रवीण फडतरे, राकेश खांडके, मुनीर मुल्ला, गणेश कापरे, मोहन पवार, अमित सपकाळ, प्रमोद सावंत, रोहित निकम, विशाल पवार, पृथ्वीराज जाधव, अमृत कर्पे यांनी कारवाईत भाग घेतला होता.