पुणे: दिमाखदार मिरवणुकीने श्रीमंत भाऊसाहेब रंगारी गणपती बाप्पांचे विसर्जन; “मयूरपंख” रथ ठरला आकर्षण

* लक्ष-लक्ष डोळ्यांचे फिटले पारणे
* ट्रस्टचे उत्सवप्रमुख पुनीत बालन यांनी केले रथाचे सारथ्य
* 132 वर्षांपूर्वीच्या रथाची परंपरा मंडळाने जपली
पुणे – फुलांची आकर्षक सजावट…कोल्ड फायरची विद्युत रोषणाई…त्यात ढोल-ताशा पथकांचा निनाद…भाविकांची अलोट गर्दी… या भारलेल्या वातावरणात पारंपरिक अशा “मयूरपंख’ रथात विराजमान होऊन हिंदुस्थानातील पहिला सार्वजनिक गणपती श्रीमंत भाऊसाहेब रंगारी गणपती बाप्पांचे दिमाखदार मिरवणुकीने शुक्रवारी पहाटे सव्वासहा वाजता विसर्जन झाले.

प्रथा परंपरेनुसार गुरुवारी सकाळी मंडईतील लोकमान्य टिळक पुतळ्याला आणि मानाच्या पाच गणपतींना “श्रीमंत भाऊसाहेब रंगारी गणपती ट्रस्ट’कडून पुष्पहार अर्पण करून या वैभवशाली विसर्जन मिरवणुकीला सुरुवात झाली. 132 वर्षांपासून विसर्जन मिरवणुकीत असलेल्या रथाला आकर्षक असे मयूरपंख बसवून तो सजवण्यात आला होता. त्यावर फुलांची आकर्षक सजावट करण्यात आली होती.

या “मयूरपंख’ रथात श्रीमंत भाऊसाहेब रंगारी गणपतीची मूर्ती ठेवण्यात आली होती. शिवयोद्धा मर्दानी आखाड्याने शिवकालीन शस्त्रास्त्रांची प्रात्यक्षिके सादर केली. त्यानंतर समर्थ, रमणबाग आणि श्रीराम या तीन ढोलताशा पथकांचे वादन बेलबाग चौकात झाले. त्यामुळे बाबू गेनू मंडळ गेल्यानंतर तब्बल दीड तासानंतर 132 वर्षांपूर्वीच्या रथात विराजमान श्रीमंत भाऊ रंगारी मंडळाचा गणपती बेलबाग चौकात दाखल झाला.

ट्रस्टचे विश्‍वस्त आणि उत्सवप्रमुख पुनीत बालन यांच्या हस्ते आरती झाल्यानंतर बाप्पा विसर्जन मिरवणुकीत सहभागी झाला. रात्री बारा वाजता टिळक पुतळ्यापासून विसर्जन मिरवणुकीला सुरुवात झाली. स्वत: बालन यांनी या रथाचे सारथ्य केले होते. बेलबाग चौकात रथ आल्यानंतर पोलीस सहआयुक्त संदीप कर्णिक यांच्या हस्ते बाप्पांची आरती झाली.

विसर्जन मिरवणुकीत या रथापुढे शिवाजीराजे मर्दानी पथकाकडून केल्या जाणाऱ्या चित्तथरारक प्रात्यक्षिकांनी उपस्थितांचे लक्ष वेधून घेतले होते. तर समर्थ, रमणबाग आणि श्रीराम पथक यांच्या ढोल पथकांच्या वादनाने मिरवणुकीचा उत्साह वाढवला. विसर्जन मिरवणुकीच्या मार्गावर ठिकठिकाणी होणारी फुलांची उधळण, रथावर होणारी कोल्ड फायरची विद्युत आतषबाजी त्यामुळे ही मिरवणूक भक्तांच्या डोळांचे पारणे फेडणारी अशीच ठरली.

सकाळी सहा वाजता टिळक चौकात “मयूरपंख’ आल्यानंतर महापालिकेचे अतिरिक्त आयुक्त विकास ढाकणे यांच्या हस्ते बाप्पांची आरती झाली आणि बाप्पा विसर्जनासाठी मार्गस्थ झाले. सकाळी सव्वासहा वाजता श्रीमंत भाऊसाहेब रंगारी गणपतीचे भक्‍तिभावाने भावपूर्ण विसर्जन करण्यात आले.

दरवर्षीप्रमाणे यंदाही “श्रीमंत भाऊसाहेब रंगारी ट्रस्ट’ च्या गणपती बाप्पाची विसर्जन मिरवणूक जल्लोषात आणि उत्साहात पार पडली. पोलीस प्रशासनाने लक्ष्मी रस्त्यावर विसर्जन मिरवणुकीसाठी प्रवेश दिल्यानंतर आम्ही सहभागी झालो. कमीत कमी वेळेत ही मिरवणूक संपवण्याचा आम्ही प्रयत्न केला. त्यानुसार कमी वेळेत मिरवणूक संपवली. या उत्सवात सेवा दिलेले पोलीस, महापालिका अधिकारी, मंडळाचे पदाधिकारी आणि सर्व कार्यकर्ते यांचे मनःपूर्वक आभार!

– पुनीत बालन, (विश्‍वस्त आणि उत्सवप्रमुख, श्रीमंत भाऊसाहेब रंगारी ट्रस्ट)