अर्थव्यवस्था सावरण्यासाठी पाकिस्तान सरकारकडून प्रयत्न
लाहोर: पाकिस्तान सरकार आपली अर्थव्यवस्था सावरण्यासाठी सरकारी खर्चांमध्ये कपात केली आहे. त्याशिवाय वेगवेगळे उपाययोजना आखत आहेत. आता पंजाब प्रांताने एक पाऊल पुढे जात थेट राजभवन भाड्यावर देण्याची घोषणा केली आहे. पंजाब प्रांताचे राज्यपाल चौधरी मोहम्मद सरवर यांनी याबाबत ही घोषणा केली.
पाकिस्तानमधील द एक्स्प्रेस ट्रिब्युनने दिलेल्या वृत्तानुसार, ज्यांना ऐतिहासिक ठिकाणी विवाह, कॉर्पोरेट कार्यक्रम किंवा अन्य खासगी कार्यक्रम सोहळे करण्याची इच्छा आहे. अशा व्यक्तींसाठी ही योजना मदतशीर ठरणार आहे. गर्व्हनर हाऊसमध्ये आयोजित पत्रकार परिषदेत राज्यपाल सरवर यांनी ही माहिती दिली. राज्यपाल भवनाच्या लॉनमध्ये कार्यक्रमाचे आयोजन करण्यासाठी 10 लाख रुपयांचे शुल्क आकारण्यात येणार आहे. त्याशिवाय दरबार हॉलमध्ये कोणत्याही कार्यक्रमाच्या आयोजनासाठी पाच लाख रुपयांचे शुल्क आकारण्यात येणार आहे.
या राज्यपाल भवनात प्री-वेडिंग फोटोशूट करता येणार आहे. त्यासाठी 50 हजार रुपये शुल्क आकारण्यात येणार आहे. तर, व्यावसायिक फोटोशूटसाठी 10 लाख रुपयांचे शुल्क आकारण्यात येणार आहे. त्याशिवाय, राज्यपालांच्या बंगल्यात पर्यटकांनाही फिरता येणार आहे. या उपक्रमातून सरकारला चांगला महसूल मिळेल असा विश्वास राज्यपालांनी व्यक्त केला.