दोघे संशयित गुन्हे शाखा पथकाच्या ताब्यात
पुणे – युवा सेनेचे पदाधिकारी दीपक मारटकर यांच्या खूनप्रकरणी रविवारी (दि.4) आणखी चौघांना फरासखाना पोलिसांनी अटक केली. तर दोघा संशयितांना गुन्हे शाखा युनिट एकाच्या पथकाने ताब्यात घेतल्याचे सूत्रांनी सांगितले.
आतापर्यंत मारटकर खूनप्रकरणी, सात जणांना अटक करण्यात आल्याची माहिती फरासखाना पोलीस ठाण्याचे वरिष्ठ पोलीस निरीक्षक जगन्नाथ कळसकर यांनी दिली आहे. सनी कोलते, राहुल श्रीनिवास रागीर, रोहित क्षीरसागर व रोहित कांबळे अशी अटक करण्यात आलेल्यांची नावे आहेत.
दरम्यान, या प्रकरणात परिसरातील आर्थिक बाबींच्या दृष्टिकोनासह इतर बाजू गृहीत धरून तपास करण्यात येत आहे. दीपक याच्यावर 48 वार करून त्याची हत्या करण्यात आल्याने या भिषणतेमागे नेमके काय कारण आहे, याबाबत पोलीस शोध घेत आहेत. गुन्हा दाखल झाल्यापासून काही तासांच्या आतच फरासखाना पोलिसांनी तिघांना ताब्यात घेतले होते. युवा सेनेचे पदाधिकारी दीपक मारटकर यांची धारधार हत्याराने सपासप वार करून शुक्रवारी हत्या करण्यात आली.
शिवसेनेचे दिवंगत माजी नगरसेवक विजय मारटकर यांचे ते चिरंजीव होते. ही घटना गुरुवारी रात्री सव्वाबाराच्या सुमारास बुधवार पेठेतील गवळी अळी परिसरात घडली. याप्रकरणी एका राजकीय पक्षाच्या महिला पदाधिकाऱ्यासह आठ जणांवर फरासखाना पोलीस ठाण्यात गुन्हा दाखल झाला आहे. याप्रकरणी तातडीने हालचाल करत पोलिसांनी शुक्रवारी अश्विनी कांबळे, महेंद्र सराफ आणि निरंजण म्हंकाळे यांना अटक केली होती.