IPL 2024, Virat Kohli & MS Dhoni : आयपीएलमध्ये 25 मार्च रोजी एम चिन्नास्वामी स्टेडियमवर खेळल्या गेलेल्या सामन्यात रॉयल चॅलेंजर्स बंगलोर (RCB) ला पंजाब किंग्ज (PBKS) विरुद्ध 77 धावांची खेळी करून विजय मिळवून देण्यात विराट कोहलीने महत्त्वाची भूमिका बजावली. त्याने 49 चेंडूंमध्ये 11 चौकार आणि 2 षटकारांसह 77 धावा केल्या, ज्यासाठी त्याला सामनावीराचा पुरस्कारही देण्यात आला.
या खेळीमुळे RCB 4 गडी राखून जिंकला आणि IPL 2024 मधील त्यांच्या संघाचा हा पहिला विजय ठरला. आता विराट कोहलीने एका खास विक्रमात CSK चा माजी कर्णधार एमएस धोनीची बरोबरी केली आहे.
विराट कोहलीला आरसीबी विरुद्ध पीबीकेएस सामन्यात अनेक पुरस्कार मिळाले आणि त्याला सामनावीर म्हणूनही गौरविण्यात आले. आता कोहलीने आयपीएलच्या इतिहासात भारतीय खेळाडूकडून सर्वाधिक ‘मॅन ऑफ द मॅच’ पुरस्कार जिंकण्याच्या बाबतीत एमएस धोनीची बरोबरी केली आहे. कोहलीच्या आयपीएल कारकिर्दीतील हा 17वा सामनावीर पुरस्कार होता आणि एमएस धोनीनेही त्याच्या कारकिर्दीत इतक्या वेळा हा पुरस्कार जिंकला आहे.
भारतीय खेळाडूंबद्दल बोलायचे झाले तर कोहली आणि धोनी यांच्यापेक्षा फक्त रोहित शर्माच पुढे आहे, ज्याने इंडियन प्रीमियर लीगमध्ये आतापर्यंत 19 वेळा सामनावीर पुरस्कार जिंकला आहे.
आयपीएलच्या इतिहासातील सर्वाधिक मॅन ऑफ द मॅच पुरस्कार…
आयपीएलच्या इतिहासात सर्वाधिक वेळा सामनावीर पुरस्कार जिंकण्याचा विक्रम एबी डिव्हिलियर्सच्या नावावर आहे, ज्यांनी 25 वेळा हा पुरस्कार जिंकला आहे. त्याच्या खालोखाल ख्रिस गेल (22) दुसऱ्या आणि रोहित शर्मा (19) तिसऱ्या स्थानावर आहे. 18 वेळा सामनावीर ठरलेला डेव्हिड वॉर्नर या यादीत चौथ्या स्थानावर आहे. त्यांच्यानंतर विराट कोहली आणि एमएस धोनी यांचा क्रमांक लागतो, जे 17 मॅन ऑफ द मॅच पुरस्कारांसह संयुक्तपणे पाचव्या क्रमांकावर आहेत.