बीड – भाजपचे दिवंगत नेते गोपीनाथ मुंडे यांच्या पुण्यतिथीनिमित्त सर्वपक्षीय नेत्यांनी त्यांना मानवंदना दिली. गोपीनाथ मुंडे यांच्या कन्या आणि भाजप नेत्या पंकजा मुंडे यांनी घरातूनच सहकुटुंब त्यांना अभिवादन केले. तर राष्ट्रवादीचे मंत्री धनंजय मुंडे यांनी गोपीनाथ गडावर जाऊन काकांच्या स्मृतिस्थळाचे दर्शन घेतले.
पंकजा मुंडे यांनी मुंबईतील घरातूनच सहकुटुंब गोपीनाथ मुंडे यांच्या प्रतिमेचे पूजन केले. आधी पंकजा यांनी परळीला जाण्याचा निर्णय घेतला होता. मात्र बीडच्या जिल्हाधिकाऱ्यांनी केलेली विनंती मान्य करुन त्यांनी परळी दौरा रद्द केला. पंकजा मुंडे यांची धाकटी भगिनी आणि भाजप खासदार डॉ. प्रीतम मुंडे यांनी गोपीनाथ गडावर जाऊन समाधीचे दर्शन घेतले.
परळीचे आमदार धनंजय मुंडेही बीडमध्ये असल्याने ते गोपीनाथ गडावर गेले होते. लोकनेते स्व. गोपीनाथराव मुंडे साहेब यांच्या पुण्यतिथीदिनी गोपीनाथ गडावर जाऊन त्यांच्या स्मृतिस्थळाचे दर्शन घेतले. आप्पा, तुम्ही अंगीकारलेला लोकसेवेचा वसा मी अविरत पुढे सुरू ठेवणार हा माझा शब्द आहे. सदैव तुमच्या आठवणीत, असे ट्वीट धनंजय मुंडे यांनी केले आहे.