पिंपरी -ऑनलाईन पेमेंटसाठी अनेक ऍप उपलब्ध आहेत. अनेकजण सुविधा म्हणून त्याचा वापर करतात. परंतु त्यापैकी काही ऍप हे फेक असल्याने फसवणूक करणाऱ्यांचे आयते साधत आहे. तर त्याचा फटका शहरातील व्यापाऱ्यांना बसत आहे. फसवणूक करण्याची प्रकरणे दिवसेंदिवस वाढत असल्याने “डिजिटल पेमेंट ऍप’वर विश्वास ठेवायचा की नाही? असा प्रश्न व्यापाऱ्यांना पडल्याचे पडला आहे.
गेल्या काही वर्षांपासून डिजिटल पेमेंटला सरकार, व्यावसायिकांनी मोठे प्रोत्साहन दिले. त्यामुळे सामान्य नागरिकांचा कलही डिजिटल पेमेंटकडे वाढला. आज प्रत्येक दुकान, व्यावसायिक, व्यापाऱ्याकडेच नव्हे तर अगदी फेरीवाल्यांकडेही डिजिटल पेमेंट घेण्याची सोय आहे. तर बहुतांश ग्राहक याच पद्धतीने पेमेंट करीत आहेत. यासाठी वेगवेगळ्या कंपन्यांचे ऍप्स असून ते सुरक्षित मानले जातात. परंतु पेटीएम स्पूफ’ सारखे काही ऍप उपलब्ध झाल्याने अनेकांची फसगत होत आहे. मुख्य प्रवाहातील ऍपसारखी कॉपी केलेली असल्याने हा फसवणुकीचा प्रकारही लवकर लक्षात येत नाही. मात्र पिंपरी पोलिसांनी फसवणूक झालेल्या या प्रकरणाची उकल केल्याने व्यापाऱ्यांना काही प्रमाणात दिलासा मिळाला आहे.
गेल्या काही दिवसांत फेक ऍपमधून होत असलेल्या फसवणुकीचे व्हीडीओही सोशल मीडियावर व्हायरल झाले आहेत. यापूर्वी ओटीपी क्रमांक घेऊन अथवा लिंक ओपन केल्यावर बॅंक खात्यातील पैसे चोरीला गेल्याबाबत अनेक गुन्हे दाखल झाले आहेत. त्यात फेक ऍपद्वारे फसवणूक हा नवीनच प्रकार आहे. भविष्यात असे प्रकार होऊ नयेत यासाठी सतर्क राहण्याची गरज आहे. काय काळजी घ्याल?
कोणाकडूनही पैसे घेतल्यानंतर बॅंक खात्यातील शिल्लक रक्कम तपासून पाहावी. बॅंकेत पैसे कुठून जमा झाले, ते स्त्रोतही पडताळून पाहणे गरजेचे आहे. खात्यात पैसे जमा झाल्याची सूचना बॅंकेकडून आली की नाही, याची नेहमी खात्री करणे आवश्यक आहे.सतर्क होण्याची गरज; फसवणुकीचे प्रकार घडल्यानंतर काही गुन्ह्यांची पोलिसांकडून उकल
अशी केली जाते फसवणूक
फसवणूक करणारी व्यक्ती प्रथम दुकानातून खरेदी करते. यानंतर, डिजिटल पेमेंट करताना “पेटीएम स्प्रूफ’ सारखे ऍप वापरून बनावट पेमेंट सूचना तयार करते. यासाठी ग्राहक बनून आलेली फसवणूक करणारी व्यक्ती दुकानाचे नाव, दुकानदाराचा फोन क्रमांक त्यात ‘फीड’ करते अन दुकानदाराला बनावट पेमेंट पावती दाखवते, जी हुबेहुब खऱ्यासारखीच दिसते. एवढेच नव्हे तर “पेटीएम स्पूफ’ दुकानदाराच्या खात्यावर पैसे भरण्याची खोटी सूचना पाठवते, परंतु प्रत्यक्षात हे पैसे बॅंक खात्यात जमा होत नाहीत.