नवी दिल्ली – देशाची राजधानी दिल्लीतून तळीरामांसाठी खूशखबर आली आहे. दिल्ली सरकारने आता आपल्या नवीन उत्पादन शुल्क धोरणांतर्गत ड्राय डे ची संख्या कमी केली आहे. पूर्वी वर्षात 21 दिवस ड्राय डे असायचे मात्र आता दिल्लीत फक्त तीन दिवस ड्राय-डे राहणार आहे. याबाबत नवा नियम लागू करण्यात आला आहे. या बातमीनंतर तळीरामांमध्ये आनंदाची लाट उसळली आहे.
कोणता दिवस ड्राय डे असेल?
दिल्ली सरकारने जारी केलेल्या आदेशात असे म्हटले आहे की, परवानाधारक दारू आणि अफूची दुकाने प्रजासत्ताक दिन (26 जानेवारी), स्वातंत्र्य दिन (15 ऑगस्ट) आणि 2 ऑक्टोबर रोजी गांधी जयंतीच्या दिवशी बंद राहतील.
हॉटेल आणि दुकानांना कोणता नियम लागू होणार?
दिल्ली उत्पादन शुल्क नियम 2010 (52) च्या तरतुदींनुसार, 2022 मध्ये 26 जानेवारी, 15 ऑगस्ट आणि 2 ऑक्टोबर रोजी राष्ट्रीय राजधानी प्रदेश दिल्लीमध्ये मद्यविक्रीला परवानगी दिली जाणार नाही. तसेच, उत्पादन शुल्क विभागाने सांगितले की एल-15 परवाना असलेले हॉटेल चालक ड्राय-डेमध्ये अतिथींना त्यांच्या खोल्यांमध्ये दारू देऊ शकतील. मात्र, या तीन ड्राय-डे व्यतिरिक्त सरकार वर्षातील कोणताही दिवस वेळोवेळी ‘ड्राय-डे’ म्हणून घोषित करू शकते, असेही आदेशात म्हटले आहे.
नवीन उत्पादन शुल्क धोरण कधी लागू करण्यात आले?
दिल्ली सरकारने गेल्या वर्षी नोव्हेंबरमध्ये नवीन उत्पादन शुल्क धोरणाला मंजुरी दिली होती. जे 17 नोव्हेंबरपासून लागू होणार आहे. नवीन उत्पादन शुल्क धोरणामध्ये अनेक नियम बदलण्यात आले आहेत. सरकारच्या नवीन उत्पादन शुल्क धोरणानुसार प्रत्येक प्रभागात तीन ते चार दारूची दुकाने सुरू होत आहेत. यापूर्वी असे 79 वॉर्ड होते जेथे दारूचे दुकान नव्हते.
गेल्या वर्षीपर्यंत होळी, दिवाळी, जन्माष्टमी, मोहरम, ईद-उल-जुहा (बकरीद), गुड फ्रायडे, राम नवमी, महावीर जयंती, बुद्ध पौर्णिमा, महर्षि वाल्मिकी जयंती, गुरु नानक जयंती, दसरा आणि इतर सण ड्राय डे म्हणून पाळले जात होते.