ICC ODI World Cup 2023 Netherlands vs Afghanistan : विश्वचषकाच्या 34व्या सामन्यात अफगाणिस्तानसमोर नेदरलँड्सचे आव्हान आहे. लखनौ येथील भारतरत्न श्री अटल बिहारी वाजपेयी एकना स्टेडियमवर दोन्ही संघांमधील हा सामना खेळला जात आहे. अफगाणिस्तानचा संघ सहा सामन्यांत तीन विजयांसह गुणतालिकेत सहाव्या स्थानावर आहे. चौथ्या विजयावर त्यांची नजर आहे. त्याचबरोबर नेदरलँड्सने सहा पैकी दोन सामने जिंकले असून आठव्या क्रमांकावर आहे. दोन्ही संघांना अजूनही उपांत्य फेरी गाठण्याची संधी आहे.
एकदिवसीय विश्वचषक 2023 मध्ये मोठा उलटफेर करणारा नेदरलँड्सचा संघ अफगाणिस्तानविरुद्ध खूपच कमकुवत दिसत होता. लखनौच्या एकना क्रिकेट स्टेडियमवर अफगाणिस्तानने नेदरलँड्सला 46.3 षटकात 179 धावांत ऑलआउट केले. या सामन्यात नेदरलँड्सने नाणेफेक जिंकून प्रथम फलंदाजी करण्याचा निर्णय घेतला, जो लखनौच्या खेळपट्टीवर त्यांच्यासाठी अजिबात अनुकूल नव्हता. संघाकडून सायब्रँड एंजेलब्रेक्टने सर्वाधिक 58 धावा केल्या. अफगाणिस्तानकडून नबीने 3 तर नूरने 2 बळी घेतले.
नाणेफेक जिंकून फलंदाजीला आलेल्यानेदरलँड्सची सुरुवात खूपच खराब झाली. पहिल्याच षटकाच्या पाचव्या चेंडूवर वेस्ली बॅरेसीच्या (01) रूपाने संघाने पहिली विकेट गमावली. त्यानंतर दुसऱ्या विकेटसाठी मॅक्स ओ’डॉड आणि कॉलिन अकरमन यांनी 69 धावांची (63 चेंडू) भागीदारी केली, जी डावातील सर्वात मोठी भागीदारी होती. ही भागीदारी 12व्या षटकाच्या तिसऱ्या चेंडूवर मॅक्स ओ’डॉडच्या विकेटने मोडली. मॅक्सनं 40 चेंडूत 9 चौकारांच्या मदतीने 42 धावांची खेळी केली.
त्यानंतर 19व्या षटकात कॉलिन अकरमन 29 धावा काढून बाद झाला. यानंतर पुढच्याच चेंडूवर कर्णधार स्कॉट एडवर्ड्स (0) पॅव्हेलियनमध्ये परतला. सलामीवीर मॅक्स ओ’डॉड, तिसऱ्या क्रमांकावरील कॉलिन अकरमन आणि कर्णधार एडवर्ड्स धावबाद होऊन पॅव्हेलियनमध्ये परतले. संघाच्या एकूण चार फलंदाजांनी धावबाद होऊन विकेट गमावल्या. कर्णधार बाद झालेल्यानंतर लगेचच बास डी लीडे 21व्या षटकात मोहम्मद नबीचा बळी ठरला. बास डी लीडे केवळ 3 धावा करू शकला. अशाप्रकारे संघाने 97 धावांत 5 विकेट गमावल्या.
त्यानंतर 26व्या षटकात साकिब झुल्फिकार 03 धावा करून नूर अहमदच्या जाळ्यात अडकला. यानंतर 31व्या षटकात लोगान व्हॅन बीक 02 धावांवर, चांगली खेळी खेळत असलेला सायब्रँड एंजेलब्रेक्ट 58 धावांवर, 42 व्या षटकात रोएलॉफ व्हॅन डर मर्वे 11 धावांवर , आणि पॉल व्हॅन मीकरेन 04 धावांवर बाद होताच नेदरलँड्सचा संघ 46.3 षटकात 179 धावांवर आटोपला.
अफगाणिस्तानच्या गोलंदाजांनी केली कमाल…
अफगाणिस्तानसाठी अनुभवी फिरकी गोलंदाज मोहम्मद नबीने 9.3 षटकात केवळ 28 धावा देत 3 बळी घेतले. याशिवाय नूर अहमदने 2 फलंदाजांना आपल्या जाळ्यात अडकवले. तर मुजीब उर रहमानला 1 यश मिळाले.
